Նիգ-ապարանցի, Տկիբուլեցի Ռուզանը՝ քիլլերի ազատության պաշտպան

«Առաջին լրատվական»-ը գրում է.

Հունվարի 29-ին, վերաքննիչ քրեական դատարանում կրկին պայթյունավտանգ իրավիճակ էր. պատճառը Գեղարքունիքի մարզի Լիճք գյուղի սպանության գործով անցնող 6 ամբաստանյալներից վերջինի՝ «Կոնչիտա» մականունով Արմեն Գորոյանի ազատության մեջ հայտնվելն էր:

Հունվարի 27-ին բանտից ազատված Արմեն Գորոյանի նկատմամբ դատարանը որպես խափանման միջոց ընտրեց մշտական բնակության վայրից ստորագրությամբ չհեռանալը: Դատարանը պարտավորեցրեց նրան՝ պատշաճ վարքագիծ դրսևորել և սահմանված կարգով ներկայանալ դատական նիստերին:

Հիշեցնենք, որ 2015թ. հունվարի 26-ին, Երևանից մի քանի մեքենաներով Գեղարքունիքի մարզի Լիճք գյուղ հասած խումբը բիտաներով, ձեռքերով, ոտքերով դաժանաբար ծեծել էր նշյալ գյուղի բնակիչ Արայիկ Իրիցյանին: Իսկ նրան օգնության հասած եղբորը՝ Արթուրին, հրազենային կրակոցով սպանել էր խմբի կազմում եղած նրա մանկության ընկեր Արմեն Գորոյանը:

Վերջինս Գեղարքունիքի մարզի առաջին ատյանի դատարանի դատավոր Յուրի Իսկոյանի կողմից դատապարտվել էր ընդամենը 3 տարվա ազատազրկման:

Գործով անցնող ամբաստանյալներն են՝ Երևանի բնակիչներ Գառնիկ Նիկողոսյանը /Գռնոն/, Արիստակես Բարսեղյանը /Արիսը/, Լիճք գյուղի բնակիչներ Արմեն Գորոյանը /Կոնչիտա/, Աշոտ Ավետիսյանը /Տոշա/, Էդգար /Ալֆա/ և Էդուարդ /Ռուսը/ Սրքոյաններ:

Եվ ահա, վերաքննիչ քրեական դատարանում, մինչ Իրիցյան եղբայրների հարազատները վրեժի ծարավից ու անզորությունից պոռթկում էին, դատավոր Ռուզաննա Բարսեղյանը գոհունակությամբ ժպտում էր:

Վրաստանի Տկիբուլի քաղաքից Նիգ-Ապարան հասած, այնտեղից էլ վերաքննիչ քրեական դատարանում դատավորի պաշտոն ստացած Ռուզաննա Բարսեղյանը և դատախազ Վարդան Լազարյանը նիստերի դահլիճից գոհ հեռացան: Դատավարության 4 ամիսների ընթացքում նրանք իրենց թողտվությամբ կամ պաշտպանական կողմի հետ միասին ամեն ինչ արեցին նիստերը տապալելու համար՝ մինչ Գորոյանի պատժաժամկետի լրանալը:

Ցավոք՝ ստացվեց. Գորոյանն ազատվեց, բայց Լիճքի հանրության համար վտանգը մեծացավ…

Աղվան Հովսեփյանի քննիչները, նրանց գործերի օրինականությունը հսկող դատախազը նախաքննության ընթացքում ազատության մեջ թողեցին գրեթե բոլոր մեղադրյալներին /չնայած առաջադրված մեղադրանքների խստությանը/, ինչից հետո գյուղի ականատես վկաները, գրեթե բոլորը՝ բարեկամ ու հարևան, փոխեցին իրենց ցուցմունքները՝ ի վնաս տուժողների:

Այժմ ամբողջ գյուղում անառողջ մթնոլորտ է. խոպանչիների ազդեցության ոլորտները կիսողների կռվից գյուղում մարդիկ անբարյացակամ ու թշնամի են դարձել, և հայտնի չէ, թե որ պահին և ինչ նոր կայծ կբռնկվի ու կտարածվի գյուղում և արտագնա աշխատանքների համար Մոսկվա մեկնողների շրջանում…

Այնպիսի տպավորություն է, որ նախաքննական մարմինը և որոշ դատավորներ գործել և գործում են Աղվան Հովսեփյանի քննչական մարմնի նախապես գծած շրջանակում կամ շահերի ազդեցության ներքո:

Մանրամասները՝ սկզբնաղբյուր կայքում: