«Կուկուռուզնիկի» շուրջ նոր աղմուկ է բարձրացել

2006 թ.-ին քանդվեց մայրաքաղաքի խորհրդանիշներից մեկը` Երիտասարդական պալատը («Կուկուռուզնիկ»): Երեկվանից բուռն քննարկումների առիթ  է դարձել Երիտասարդական պալատի նախագծի շրջանակներում մրցույթին ներկայացված նախագծերից մեկի լուսանկարը, որտեղ ներկայացված շենքի վրա խաչ է պատկերված:

Նախագիծը ներկայացնող ASK group of companies-ը ֆեյսբուքյան իր էջում ներկայացրած լուսանկարների տակ պատասխանելով օգտատերերի քննադատական մեկնաբանություններին, գրել է. «Սա 10 տարի առաջ արված էսքիզ է: Մտածելով չնեղացնել մուսուլման տուրիստներին` արվել է երկրորդ տարբերակը՝ կլոր ապակիով, որի մասին ընդհանրապես չի խոսվում: Բայց ինձ համար որ շատ զարմանալի է՝ մեր մեջ ավելի շատ կան խաչից վախեցող մուսուլմաններ, պարապ, ոչ մի բարիք չստեղծող, միայն քննադատող, անդաստիարակ, քֆուրներ գրող մարդիկ: Սա եղել է ուղղակի առաջարկ՝ առանց որևէ գումարի: Եթե մի քիչ ուշադիր կարդաք, կտեսնեք` ովքեր են կոպիտ ու անտաշ, բռի»:

 

Խոսելով նախագծի մասին, ԼՈւՐԵՐ.com-ի թղթակցի հետ զրույցում ճարտարապետ Անահիտ Թարխանյանն ընդգեց, որ ներկայացված նախագծերը շատ վաղուցվա են:

 

««ԱՍՔ գրուպ»-ի հայտնի գործն է, որը շատ անհաջող աշխատանք է: Որքան տեղյակ եմ՝ հեղինակն ինքն էլ ասել է, որ այն ոչ հաջողված գործ է և որքան գիտեմ՝ ինքն էլ տեղյակ չէ՝ ինչպես է այն հայտնվել համացանցում»,- ասաց Թարխանյանը:

Անդրադառնալով Երիտասարդական պալատի տեղում կառուցվելիք շենքին ճարտարապետը գտնում է, որ միայն ու միայն պետք է վերականգնել Երիտասարդական պալատի շենքը, որը Հայաստանի և երևանցիների խորհրդանիշն էր. «Այն լավագույնս արտացոլում և լրացնում էր քաղաքաշինական տարածքի ամբողջականությունը: Մյուս կողմից էլ դրանից ավելի հաջողակ նախագիծ այսքան տարիների ընթացքում ես չեմ տեսել, որը նոր լուծումը առաջարկի, թե ինչպիսին կարող է լինել հյուրանոցը Երիտասարդական պալատի տարածքում: Իմ կարծիքն անփոփոխ է, այն է՝ Երիտասարդական պալատը պետք է վերականգնվի»,-հավելեց Թարխանյանը:

Հիշեցնենք՝1979 թ. բացված Երիտասարդական պալատը՝ ճարտարապետներ Արթուր Թարխանյանի, Սպարտակ Խաչիկյանի և Հրաչ Պողոսյանի ամենահայտնի գործերից մեկն է:

Սոնա Հարությունյան