Դեսպան Մելքոնյանը Կահիրեում ներկայացրել է Հայաստանը

Կահիրեի «Կոսմոպոլիտ» միջազգային ակումբը հունվարի 29-ին կազմակերպել է Հայաստանին նվիրված հատուկ երեկո, որին ներկա էին ակումբի անդամներ, Եգիպտոսի հասարակական և գործարար շրջանակների, Կահիրեի հայ համայքնի ներկայացուցիչներ, հոգևոր առաջնորդներ։ Այս մասին տեղեկացրին ՀՀ արտաքին գործերի նախարարության մամուլի, տեղեկատվության և հասարակայնության հետ կապի վարչությունից։

Հաղորդագրության մեջ նաև նշված է. «Հայաստանին նվիրված հանգամանալից ելույթով հանդես եկավ Եգիպտոսում ՀՀ դեսպան Արմեն Մելքոնյանը, ով ներկայացրեց Հայաստանի և հայ ժողովրդի անցած ուղին, ՀՀ արտաքին քաղաքականության առաջնահերությունները, տնտեսական զարգացման և ներդրումային հնարավորությունները, մշակութային առանձնահատկությունները, երկրի զբոսաշրջային գրավչությունն ու հայկական Սփյուռքի դերակատարությունը։

Դեսպան Մելքոնյանը նաև անդրադարձավ Լեռնային Ղարաբաղի հակամարտության խաղաղ կարգավորմանն ուղղված Հայաստանի և միջազգային հանրության ջանքերին ու Հայոց ցեղասպանության միջազգային ճանաչման գործընթացին։ Հանդիպման ավարտին դեսպան Մելքոնյանը պատասխանեց ներկաների բազմաթիվ հարցերին։

Երեկոյի ընթացքում տեղի ունեցավ Հայաստանի մասին պատմող ֆիլմի ցուցադրություն և հայկական երաժշտության համերգ։

Տեղեկանք. «Կոսմոպոլիտը» Եգիպտոսում գործող նշանավոր ռոտարական ակումբներից է, որն իր շարքերում միավորում էինչպես եգիպտացի, այնպես էլ՝ օտարերկրացի տարբեր ոլորտների գործիչների»։