Հրանուշ Հակոբյանի աշխատանքային այցն Ավստրիայի Հանրապետություն

Օրերս աշխատանքային այցով Ավստրիայում էր գտնվում ՀՀ սփյուռքի նախարար Հրանուշ Հակոբյանը:

Նախարար Հ.Հակոբյանը Վիեննայում եղավ Հայ եկեղեցական միության խնամատարության ներքո գործող «Հովհաննես Շիրազ» շաբաթօրյա դպրոցում, ուր սովորում է շուրջ 160 աշակերտ: Նա ծանոթացավ դպրոցի առկա խնդիրներին, ներկայացրեց նախարարության ծրագրերը, ծանոթացավ աշակերտության հետ: Հ. Հակոբյանը ՀՀ սփյուռքի նախարարության պատվոգրերով պարգևատրեց վաստակաշատ մանկավարժներին:

Այնուհետև նախարար Հ. Հակոբյանն այցելեց Վիեննայում գործող Մխիթարյան Միաբանություն:

Վիեննայի հայ առաքելական Սբ. Հռիփսիմե եկեղեցում նախարարը մասնակցեց մատուցված պատարագին: Այնուհետև տիկին Հակոբյանը հանդիպումներ և քննարկումներ ունեցավ ավստրահայ համայնքային կազմակերպությունների` Ավստրիայի հայ եկեղեցական վարչության, Ավստրո-հայկական մշակութային ընկերության, «Հայաստան համահայկական հիմնադրամի» Վիեննայի մասնաճյուղի, Հայ բարեգործական ընդհանուր միության Վիեննայի մասնաճյուղի, Հայ ուսանողական և երիտասարդական միության, «Արարատ» մարզական միության ներկայացուցիչների հետ: Հանդիպման ավարտին` Ավստրահայ համայնքի կյանքում ունեցած նշանակալի ավանդի համար Հ. Հակոբյանը ՀՀ սփյուռքի նախարարության «Պողոս Նուբար» մեդալներով պարգևատրեց Ավստրո-հայկական մշակութային ընկերության նախագահ Ռազմիկ Թահմազյան-Հարթունյանին և Արարատ մարզական միության նախագահ Սեպուհ Բաղդոյանին:

ՀՀ սփյուռքի նախարարության առաջիկա ծրագրերի վերաբերյալ Հ. Հակոբյանը հարցազրույց տվեց Ավստրիայում հրատարակվող «Պրոֆիլ» շաբաթաթերթի թղթակցին: