Մեկնարկեց «Արի տուն» ծրագրի երրորդ փուլը
Սփյուռք
Հուլիսի 2-ին ՀՀ սփյուռքի նախարարությունում կայացավ «Արի տուն» 2012թ. ծրագրի երրորդ փուլի բացումը: Ներկա էին Երևանի վարչական շրջանների, տեղական ինքնակառավարման մարմինների, սփյուռքի հայ համայնքների, ինչպես նաև հյուրընկալ ընտանիքների ներկայացուցիչներ և «Արի տուն» 2012թ. ծրագրի երրորդ փուլի մասնակիցները:
Ողջունելով ներկաներին և ազդարարելով «Արի տուն» 2012թ. ծրագրի երրորդ փուլի մեկնարկը` ՀՀ սփյուռքի նախարար Հ.Հակոբյանը նշեց,-«Կատարվել է ձեզանից շատ շատերի երազանքը` եկել եք Հայրենիք, ոտք դրել Մայր հողի վրա, ինչի համար և ձեզ և ձեր ծնողներին շնորհակալ ենք: Մեր նպատակն է, որ գաք և ծանոթանաք ձեր Հայրենիքին, լինեք տեսարժան վայրերում և Հայաստանից հեռանաք առավել մեծացած, հզորացած, Հայրենիքը սիրած: Այս ծրագիրը յուրօրինակ կամուրջ է սփյուռքահայ երիտասարդության և Հայրենիքի միջև»: Այնուհետև ծրագրին աջակցելու համար նախարար Հ.Հակոբյանը շնորհակալություն հայտնեց պետական և տեղական ինքնակառավարման մարմինների ներկայացուցիչներին, հյուրընկալ ընտանիքներին:
«Արի տուն» ծրագրի երրորդ փուլին կմասնակցի Ռուսաստանի Դաշնությունից, Վրաստանից, Կանադայից, Սիրիայից, Հորդանանից և Ռումինիայից 94 երիտասարդ:
Արմինե Սարգսյանը, ով արդեն չորրորդ անգամ է իր ընտանիքում հյուրընկալում Սփյուռքից ժամանած երիտասարդներին, «Արի տուն» ծրագրին նվիրեց իր հեղինակած բանաստեղծությունը.
«Սփյուռք է անունը այն մեծ հանրության,
Որի մասնիկն ես համարվում և դու,
Ավաղ, ծնվել ես դու օտար հողում,
Բայց ունես անուն հպարտ հայորդու
Գիտեմ, որ մի օր բոլորի նման,
Քո պապն ու տատն էլ դրած քեզ ծնկին,
Հեքիաթ են պատմել այն երկրի մասին,
Որի կարոտը մնաց անդարման:
Ու վարակվել ես դու այդ կարոտով`
Հայրենի հողի ու Հայրենիքի,
Բայց դու նրանից չես էլ բաժանվել,
Հանդիպման մասին միշտ երազել ես,
Սակայն հրաժեշտ երբեք չես տվել,
Սիրել ես ուժգին, բայց չես ճանաչել,
Հպարտ ես եղել նրա գոյությամբ,
Բայց չես հասկացել, որ այնտեղ հեռվում` քո Հայրենիքում
Միշտ սպասում են քեզ, քեզնով լիանում,
Քեզնով միանում ու հպարտանում:
Ու երբ ցանկանաս ճանաչել դու քեզ, արի Հայաստան,
Ուր հայ մայրերը` Մայր Հայաստանի,
Աչքերը հառած քո ճանապարհին,
Ձեռքերը պարզած ու դռները բաց,
Կարոտած մոր պես, ասում են միշտ քեզ
«Արի տուն, բալես»»:
ՈՒՂԻՂ ԵԹԵՐ
Ամենադիտված 
«Անցած գիշեր Գյումրիի երկնքում բնակիչները ֆիքսել են այսպիսի լուսին». Գագիկ Սուրենյան (տեսանյութ)
