Լոս Անջելեսի հայությունը ևս դատապարտում է «Հարսնաքարի» ոճիրը

Գլենդելի Հայաստանի հյուպատոսարանի առջև հավաքված հայ համայնքի մի խումբ ներկայացուցիչներ և տեղի հասարակական քաղաքական կյանքին ակտիվ մասնակցություն ցուցաբերող հայեր ծաղիկներ են դրել հյուպատոսարանի մուտքի առջև և միացել են իրենց բողոքի ձայնը բարձրացրած հայրենակիցներին՝ ի հիշատակ հունիսի 17–ին «Հարսնաքար» ռեստորանում դաժան ծեծի պատճառով մահացած ռազմական բժիշկ Վահե Ավետյանին։ 

«Սա անուղղակի ազդում է մեր երկրի վիճակի վրա, ինչն էլ իր հերթին նպաստում է Հայաստանից մարդկանց և մասնավորապես՝ երիտասարդության արտագաղթին։ Դրա պատճառը ոչ թե գործազրկությունն է, այլ երկրի անկայությունը, այն, որ ապագա չկա։ Մենք չպետք է հանդուրժենք այն, ինչ կատարվում է մեր հայրենիքում։ Մենք այդպիսի անկախություն չենք երազել», – հաղորդում է «Ասպարեզ»–ը՝ մեջբերելով Վահե Ավետյանի նկարը հյուպատոսարանի մուտքի մոտ փակցրած ակցիայի մասնակցի խոսքերը։

«Հայաստանը ջունգլիների է վերածվել։ Իշխանությունը, որ պետք է օրինակ հանդիսանա ժողովրդի համար, նրա օրինակը միայն վայրենությունն է։ Հայաստանի իշխանությունների վարվելակերպը բոլորովին ընդունելի չէ Սփյուռքի համար», – հայտարարել է ակցիայի մասնակից իրավաբան Անժելա Բարսեղյանը։