Մեկնարկեցին «Սփյուռք» ամառային դպրոցի դասընթացները

Հուլիսի 10-ին ԵՊՀ-ում կայացավ «Սփյուռք» ամառային դպրոցի լրագրողների վերապատրաստման և երիտասարդ առաջնորդների դասընթացների մեկնարկման արարողությունը: Ներկա էին ԵՊՀ դասախոսներ և ուսանողներ, «Սփյուռք» ամառային դպրոցի մասնակիցներ:

ՀՀ սփյուռքի նախարարության աշխատակազմի համահայկական ծրագրերի վարչության պետ Ա.Մխիթարյանը, ողջունելով ներկաներին և ներկայացնելով «Սփյուռք» ամառային դպրոցի ծրագիրը,նշեց. «21-րդ դարում աշխարհասփյուռ հայությունը կանգնած է նոր մարտահրավերների առաջ, համայնքները վերակազմավորման նոր գործընթաց են սկսել, և դա կարող է անել այն հայը, ով տիրապետում է ժամանակակից տեղեկատվական տեխնոլոգիաներին, կարող է համախմբել և առաջնորդել համայնքը: Այդ պատճառով է, որ արդեն երկրորդ տարին ՀՀ սփյուռքի նախարարությունը կազմակերպել է այս դասընթացները»:

ԵՊՀ պրոռեկտոր Ռ.Մարկոսյանը, ելույթ ունենալով, մասնավորապես նշեց, որ կազմակերպված Սփյուռք ունենալու համար կարևոր են Սփյուռքի երիտասարդական, ուսանողական միությունների հետ տարվող աշխատանքները, նրանց փոխգործակցությունը հայաստանյան երիտասարդական կազմակերպություւների հետ:

Ներկաներին ողջունեց նաև ԵՊՀ ժուռնալիստիկայի ֆակուլտետի դեկան Ն.Մարտիրոսյանը' մասնավորապես նշելով. «Մեր ժողովորդն այսօր լուրջ մարտահրավերների է դիմակայում, և դրանց դիմակայելիս հաճախ լինում են հերոսացումներ, հիշարժան իրողություններ, որոնց արձանագրողը լրագրողն է: Պատմության կերտողը ժողովուրդն է, իսկ այն կենդանի պահողը, տարածողը, սերունդներին փոխանցողը լրագրողն է»:

Ներկաների առջև ելույթ ունեցան ԵՊՀ-ի երգչախումբը և մշակութային կենտրոնի պարային համույթը:

Միջոցառման ավարտին «Սփյուռք» ամառային դպրոցի լրագրողների վերապատրաստման դասընթացի մասնակիցները ԵՊՀ Ժուռնալիստիկայի ֆակուլտետի շրջանավարտներին հանձնեցին ավարտական դիպլոմները: Որոշվեց այս գեղեցիկ արարողությունը դարձնել ավանդույթ: