Վահան Արծրունին՝ Բժշկականի խորհրդի նախագահի պաշտոնում առաջադրվելու մասին

Նոյեմբերի 12-ին, վարչապետի հրամանով ձևավորված Մխիթար Հերացու անվան պետական բժշկական համալսարանի հոգաբարձուների խորհրդի 32 անդամները պետք է նախագահ ընտրեն։ Այս պահին քննարկվում է 2 թեկնածուի՝ Վերարտադրողական բժշկության ասոցիացիայի նախագահ Էդիկ Համբարձումյանի և մասնագիտությամբ երգահան, բժիշկ Վահան Արծրունու անունները։

ԼՈւՐԵՐ․com-ի թղթակցի հետ զրույցում Վահան Արծրունին հայտնեց, որ նոր է վերադարձել Սանկտ Պետերբուրգից, քանի որ համերգ ուներ, իսկ այդ մասին իմացել է մամուլից. «Ինձ առաջարկել է պրոֆեսորադասախոսական անձնակազմը և ուսանողական կազմը։ Սա ինձ համար շատ հաճելի անակնկալ էր։ Նշեմ նաև, որ ես իսկզբանե ԿԳ նախարար Արայիկ Հարությունյանի առաջարկով ընդգրկված էի որպես հոգաբարձուների խորհրդի անդամ»,- նշեց Վահան Արծրունին։

Հարցին, թե ինչ կապ ունի բժշկության ոլորտի հետ, հանրությանը որպես երգահան հայտնի Արծրունին այսպես պատասխանեց․ «Կներե՛ք, Լիլիթ Մակունցը հայտնի էր որպես թարգմանիչ, իսկ Հայկ Մարությանը՝ Կարգին Հայկո, իմ երաժիշտ լինելու հանգամանքով մտահոգված մարդկանց նույն ուժգնությամբ պետք է մտահոգեն նաև այդ հարցերը։ Սակայն իմ թվարկած անհատների պարագայում որևէ հակասություն չեմ տեսնում։ Ես ավարտել եմ և՛ Բժշկական ինստիտուտը, և՛ պետկոնսերվատորիան։ Այնպես որ իմ երկու բարձրագույն կրթությունը թույլ է տալիս ցանկացած պահի զբաղվել այդ ոլորտներից մեկով։ Բայցի այդ՝ ծառայել եմ նաև ազգային բանակում որպես ռազմական բժիշկ։ Ինչ վերաբերում է անձնական մոտիվացիաներին, որոնք թույլ են տալիս ընդունել նման առաջադրումը որպես բարձրագույն պատիվ, պայմանավորված են նրանով, որ ես պրոֆեսոր Վահան Արծրունու թոռն եմ։ Նրա հիմնադրած հաստատության շնորհիվ են այսօր հաճախ տարակարծություններ հայտնող անձինք լուծում օրվա հացի առկայությունը»,- ասաց նա։

Նա նշեց` հոգաբարձուների խորհուրդը հասարակական-մասնագիտական կառույց է, որը վերահսկողական և համակարգող ֆունկցիաներ ունի հանուն համալսարանի բարօրության։ Ապա նկատեց՝ սա այն դաշտն է, որը չպետք է ծնի կոնֆլիկտային իրավիճակներ․ «Սա այն դաշտն է, որին ես պատրաստ եմ ծառայեցնել իմ բոլոր ունակությունները։ Այն մարդկանց, որոնց ցանկությունը սա որպես աթոռակռիվ ներկայացնելն է, ուզում եմ հայտնել, որ ես շատ հեռու եմ այդպիսի բաներից և ինձ ներքաշել այդպիսի բանբասանքների մեջ հնարավոր չէ։ Այն հանգամանքը, որ ես դուրս եմ ոլորտից, սա մեծ պլյուս է, որովհետև դա թույլ է տալիս անաչառ դիրքորոշում ունենալ և չենթարկվել հոսանքների, որոնք բազմաթիվ են բժշկական ոլորտում»։ 

Իր անվան շուրջ տրամադրություններ ստեղծելու փորձերի թիրախը, ըստ Արծրունու, ոչ թե իր առաջադրումն է, այլ ներկա ռեկտոր Արմեն Մուրադյանը․ «Ակնհայտ է, որ իմ անունն ու առաջադրումն օգտագործում են, որպեսզի առիթ լինի խոսելու Արմեն Մուրադյանի դեմ, ես դա մերժում եմ և թույլ չեմ տա իմ անունը որևէ կերպ շահարկել ինչ-որ հարցում։ Ունեմ իմ հստակ դիրքորոշումն ու պատկերացումները և այսօր չէ, որ պետք է իմ արժեհամակարգը հանրայնացնեմ և պաշտպանեմ»,- ընդգծեց նա՝ ավելացնելով՝ որքան երաժշտությունն է իր համար հոգեհարազատ ոլորտ, այնպես էլ բժշկությունը։  

Հիշեցնենք, որ համալսարանի խորհրդի նախկին նախագահն Արմեն Աշոտյանն էր:

Սոնա Հարությունյան