Նիկոլ Փաշինյանն է՞լ է հանցագործ

Ինչպես հայտնի է Ֆինանսների նախարարությունը հանրային քննարկման է ներկայացրել Հարկային օրենսգրքի մի նախագիծ, որով նախատեսվում է հաշվապահական հաշվառման, իրավաբանական ծառայություններ մատուցող անձանց, այդ թվում` փաստաբանների, խորհրդատվական ընկերությունների համար շրջանառության հարկ վճարող համարվելու հնարավորությունը սահմանափակել:

Այս առիթով երեկ հրավիրվել էր հանրային քննարկում, սակայն ուշագրավը ոչ թե բուն օրենքի նախագծի դրույթներն էին, այլ Ֆինանսների փոխնախարար Արման Պողոսյանի հայտարարությունը։ Արձագանքելով փաստաբանական ծառայությունները ԱԱՀ–ից ազատելու առաջարկին՝ փոխնախարարը հայտարարեց, թե փաստաբանական ծառայություններին ավելացված արժեքի հարկից ազատելով կամ նրանց համար ցածր հարկային բեռ սահմանելով, բոլորն են օգտվելու դրանից, այդ թվում՝ հանցագործները, որոնք ևս դիմում են փաստաբանական ծառայությունների համար․ «Մենք ազգովի պետք է սուբսիդավորե՞նք այդ հանցագործին»։

Փոխնախարարի կողմից արված արտահայտությունը խոսում է վերջինիս անտեղյակության մասին։ Նա արեց արտահայտություն, որով, այսպես ասած, նեղացրեց փաստաբանների մասնագիտական ծառայությունների ոլորտը, սակայն հարկ չենք համարում ինքներս բացատրել փոխնախարարին, որ փաստաբանական ծառայությունները չեն ենթադրում միայն հանցագործի պաշտպանություն, քանի որ ի թիվս քրեական գործերի, փաստաբանները սպասարկում են բոլորին, որոնք «հանցագործներ» չեն, այլ՝ հայցվորներ, պատասխանողներ, վկաներ, որոնք կապ չունեն հանցագործության հետ։

Փաստաբանները քննադատության արժանացած փոխնախարարին հիշեցնում էին, որ հեղափոխությունը հաջողել է նաև այն բանի շնորհիվ, որ ժամանակին որոշ փաստաբաններ իրականացրել են մի «հանցագործի» շահերի պաշտպանություն, որն այսօր երկրի վարչապետն է։ Եթե այդ տեսանկյունից նայեք, ապա ստացվում է՝ վարչապետն է՞լ է հանցագործ, քանի որ ժամանակին նրա նկատմամբ հարուցված էին քրեական գործեր, որի իրավունքները պաշտպանում էին փաստաբաններ։

Սոնա Հարությունյան