Ի՞նչ սկզբունքով է նոր կառավարությունն ազատվում փորձառու կադրերից

Այսօր ՀՀ կառավարությունը որոշում կայացրեց 2018թ. հունիսից աշխատանքի անցած Ավետիք Էլոյանին ազատել Քաղաքաշինության կոմիտեի նախագահի պաշտոնից: Ուշագրավ է այն, որ պաշտոնից ազատման հիմքերի մասին տեղեկություններ կառավարության նիստում չեն հրապարակվել:

Նախ նշենք, որ ճարտարապետ Ավետիք Էլոյանը 2002 թվականից բնակվում և իր մասնագիտական գործունեությունն էր ծավալում Միացյալ Նահանգներում: Վերջինս զբաղվել է խոշոր ենթակառուցվածքների նախագծմամբ: Էլոյանի գործունեությանը լավատեղյակ լինելով, ՀՀ փոխվարչապետ Մհեր Գրիգորյանը կառավարություն էր ներկայացրել նրա՝ աշխատանքի անցնելու որոշումը: Հատկանշական է այն, որ չնայած նրան, որ Ավետիք Էլոյանը անփորձ կամ սկանդալային պատմություններով հայտնի կերպար չէ, այնուամենայնիվ, ՀՀ կառավարությունը հանկարծ որոշում է առանց պատճառաբանման ազատել նրան, ինչը արել է այն կադրերի հետ, որոնք, ըստ կառավարության անձնակազմի մեկնաբանությունների՝ ներգրավված են եղել չարաշահումների և/կամ կոռուպցիոն գործարկների մեջ:

Այս համատեքստում մեկ այլ ուշագրավ փաստ ևս կա. վերջերս, կրկին առանց պատճառաբանման՝ աշխատանքից ազատվեց բնապահպանության և ընդերքի տեսչական մարմնի ղեկավար Արթուր Գրիգորյանը: Ի տարբերություն Էլոյանի, Գրիգորյանի՝ աշխատանքից ազատման պատճառների մասին մամուլում մի շարք հրապարակումներ եղան, մասնավորապես այն, որ աշխատանքից ազատվել է Ամուլսարի շուրջ Տիգրան Ավինյանի հետ ունեցած տարաձայնության պատճառով, այսինքն՝ Գրիգորյանը պայքարել է, որ Ամուլսարը հանքավայր չդառնա։ 

Իհարկե, այս տեղեկությունը մեկնաբանել է փոխվարչապետ Ավինյանը՝ ասելով, որ ինքն առնչություն չունի Գրիգորյանի՝ աշխատանքից ազատվելու հետ. «Մենք նպատահարմար չենք համարել պարոն Գրիգորյանի պաշտոնավարումը, որովհետև չենք տեսել, որ իր պաշտոնավարումը համապատասխանում է այն  պաշտոնին, որին ինքը նշանակված է»,- ասել է Ավինյանը:

Մենք փորձեցինք կապ հաստատել թե՛ Ավետիք Էլոյանի, և թե՛ Արթուր Գրիգորյանի հետ, սակայն վերջիններ այդպես էլ չպատասխանեցին: