Հայաստանում առաջին անգամ ստեղծվել է կրթական խաղ-ձեռնարկ

Առաջին համահայկական կրթական խաղ-ձեռնարկը դպրոցականներին հնարավորություն կտա դասերն ավելի ակտիվ անցկացնել և ավելի շատ գիտելիքներ ստանալ:

Lրագրողների հետ զրույցում այս մասին ասաց «Երիտասարդները հանուն զարգացման» հիմնադրամի գործադիր տնօրեն Խաչիկ Աբաջյանը:

«Խաղերը 70-ն են և նախատեսված են ուսուցիչների համար, որպեսզի կարողանան դասապրոցեսն ավելի ակտիվ ու հետաքրքիր անցկացնել: Վարժությունները բաժանվում են մի քանի մասի՝ 18 ծանոթացման, 18 ակտիվացնող և սառույցկոտրուկ, 34 թիմային, կոնֆլիկտների հաղթահարում, հաղորդակցում և վստահություն  խաղ-վարժություններ»,- նշեց Աբաջյանը:

Խաղերը դասավորված են հատուկ պայուսակի մեջ 70 խաղ և դրանց համար անհրաժեշտ բոլոր պարագաները՝ պինգպոնգի գնդակներ, գունավոր կավիճներ, փուչիկներ և այլն:  

Խաչիկ Աբաջյանն ընդգծեց, որ խաղ-ձեռնարկը գտնվել է նաև Կրթության ազգային ինստիտուտում՝ գրաքննությունը դրական է եղել, ՀՀ կրթության և գիտության նախարար Արայիկ Հարությունյանն էլ երաշխավորել է այն որպես ուսումնաօժանդակ նյութ:

«Ձեռնարկն ազատ վաճառվելու է և մեկ պայուսակը բավական է ամբողջ դպրոցի համար: Պայուսակներն արժեն 18 500 դրամ»,- ասաց «Երիտասարդները հանուն զարգացման» հիմնադրամի գործադիր տնօրենը:

Կրթության ազգային ինստիտուտի Մանկավարժության գիտահետազոտական բաժնի մասնագետ Աննա Խուդոյանը նշեց, որ ձեռնարկն ուսումնասիրել են մոտ 1 ամիս:

«Մենք նույնպես խաղացել ենք այդ խաղերը, որպեսզի հասկանանք, թե որ խաղն ինչպես կարելի է տեղայնացնել դպրոցում: Վստահ կարող եմ ասել, որ այս խաղ-ձեռնարկը բազմաֆունկցիոնալ է և կարող են օգտագործել բոլոր ուսուցիչներն ու դասընթացավարները»,- շեշտեց Խուդոյանը:

Յուրաքանչյուր խաղի համար սահմանվել է հատուկ տարիքային խումբ՝ 8-16 տարեկանների համար: