Գեղարքունիքի մարզի 2018-ի առողջապահության գլոբալ բյուջեն կազմել է մոտ 2.6 մլրդ դրամ

Գեղարքունիքի մարզի առողջապահական ոլորտում 2018 թվականին Գեղարքունիքի մարզպետարանի ենթակայությամբ գործել են 39 բուժհաստատություններ: Ինչպես տեղեկացրեց Գեղարքունիքի մարզպետարանի առողջապահության եւ սոցիալական ապահովության վարչության պետ Անուշ Պողոսյանը, նախորդ տարում մարզի առողջապահության գլոբալ բյուջեն կազմել է 2 միլիարդ 618 միլիոն 916 հազար դրամ, որը հատկացվել է ամբողջությամբ:

2018թ. մարզի բժշկական կազմակերպություններում վճարովի ծառայության եւ այլ մուտքերը կազմել են 246 միլիոն 944 հազար 800 դրամ: Մարզի բժշկական կազմակերպություններում աշխատել են 346 բժիշկներ, 921 բուժքույրեր, 300 կրտսեր բուժաշխատողներ եւ վարչատնտեսական աշխատողներ: Մարզում մասնավոր հիմունքներով գործել են 80 դեղատուն եւ 30 ստոմատոլոգիական գործունեությամբ զբաղվող անհատ ձեռնարկատերեր: ՀՀ Գեղարքունիքի մարզպետի կողմից վերականգնողական եւ առողջարանային բուժման ուղեգիր է հատկացվել 23 հաշմանդամի: 2018 թվականին մարզում գրանցվել է 2007 ծնունդ: Մարզի մահճակալային ֆոնդը 335 է, իսկ մահճակալային տարեկան զբաղվածությունը՝ մոտ 286 օր: Մարզում գործել է շուրջօրյա թեժ գիծ: 2018 թվականի հոկտեմբերին շահագործման է հանձնվել Սեւանի արդիականացված բժշկական կենտրոնի շենքը: