Սեյրան Օհանյանի իրավունքները խախտվե՞լ են

«Մեզ դատարան են ուղարկում մի մեղադրանքով, որը մեզ համար հասկանալի չէ»։ Այս մասին ԼՈւՐԵՐ․com-ի հետ զրույցում ասաց Մարտի 1-ի քրեական գործի շրջանակներում որպես մեղադրյալ ներգրավված Պաշտպանության նախկին նախարար Սեյրան Օհանյանի փաստաբան Կարեն Մեժլումյանը։

Նշենք, որ պաշտպանական խումբը փետրվարի 16-ին Հատուկ քննչական ծառայությունից ստացել է ծանուցում քրեական գործի նախաքննության ավարտի մասին: Փաստաբանական խումբը ծանոթանում է քրեական գործի նյութերին:

Մեզ հետ զրույցում Մեժլումյանը փոխանցեց՝ միջնորդություն են ներկայացրել նախաքննական մարմնին՝ ներկայացնելու Օհանյանին առաջադրված մեղադրանքի էությունը․ «Մենք հարց ենք ուղղել, թե ե՞րբ է սահմանադրական կարգը համարվել տապալված և ե՞րբ է այդ կարգը վերականգնվել, սակայն որևէ պատասխան չենք ստացել։ Եթե այդ հարցերի պատասխանը չունենք, ինչպե՞ս կարող ենք պաշտպանվել», - ասաց նա՝ նշելով, որ իր պաշտպանյալին առաջադրված մեղադրանքն անընդունելի է։

Նրա խոսքով՝ պաշտպանական խումբն առաջիկայում դիմելու է համապատասխան մարմիններին՝ Սեյրան Օհանյանի սահմանադրական իրավունքները խախտած պաշտոնյաներին պատասխանատվության ենթարկելու պահանջով:

Փաստաբանը նշեց՝ հուլիս ամսից Օհանյանի համար սահմանը փակ է եղել, և նա չի կարողացել դուրս գալ երկրից, այն դեպքում, երբ չի ունեցել դատավարական որևէ կարգավիճակ, ինչն, ըստ փասատաբանի, իրավունքների կոպիտ խախտում է ու խտրական դրսևորում․ «Նա չի ունեցել ո′չ կասկածյալի, ո′չ մեղադրյալի կարգավիճակ: Այդ կարգավիճակը ձեռք է բերել դեկտեմբերի 26-ին և չունենալով որևէ կարգավիճակ՝ խափանման միջոց է ընտրվել՝ չհեռանալու մասին: Սա անընդունելի է և իրավական համակարգում նման բան չի կարող լինել: Մենք հետամուտ ենք լինելու, որ համապատասխան անձինք պատասխանատվության ենթարկվեն», - նշեց նա։

Հիշեցնենք՝ Սեյրան Օհանյանը մարտի 1-ի քրեական գործի շրջանակներում մեղադրվում է սահմանադրական կարգը տապալելու համար (ՀՀ քրեական օրենսգիրք, 300.1-րդ հոդվածի 1-ին մաս): Նշենք, որ գործի շրջանակում մեղադրյալներ են նաև ՀՀ 2-րդ նախագահ Ռոբերտ Քոչարյանը, ՊՆ նախկին նախարար Միքայել Հարությունյանը, ՊՆ տեղակալի պաշտոնը զբաղեցած Յուրի Խաչատուրովը, նախագահի աշխատակազմի ղեկավարի պաշտոնը զբաղեցրած Արմեն Գևորգյանը: Նշենք, որ Միքայել Հարությունյանը հետախուզման մեջ է, իսկ մյուսների մասով նախաքննությունն ավարտվել է և կուղարկվի դատարան։