50 օր՝ Մարտի 1-ի քրգործի նյութերին ծանոթանալու համար

Հատուկ քննչական ծառայության տարածած հաղորդագրության համաձայն՝ Ռոբերտ Քոչարյանի, Սեյրան Օհանյանի, Յուրի Խաչատուրովի և Արմեն Գևորգյանի Մարտի 1-ի քրեական գործի նախաքննությունն ավարտվել է: Փաստաբանների թիմը ժամանակ էր խնդրել քննչական մարմնից՝ 76 հատորից, 250-ական էջից բաղկացած քրեական գործի նյութերին ծանոթանալու համար:

ՀՔԾ-ից ԼՈւՐԵՐ.com-ի հետ զրույցում փոխանցեցին, որ թեև պաշտպանական կողմը գործի նյութերին ծանոթանալու համար խնդրել է 76 աշխատանքային օր, սակայն քննիչի որոշմամբ սահմանվել է 50 օր:

Հիշեցնենք՝ Ռոբերտ Քոչարյանը մեղադրվում է ՀՀ քրեական օրենսգրքի 300.1-րդ հոդվածի 1-ին մասով և 311-րդ հոդվածի 4-րդ մասի 2-րդ մասով` սահմանադրական կարգը տապալելու և առանձնապես խոշոր չափերով կաշառք ստանալու մեջ, Սեյրան Օհանյանը՝  քրեական օրենսգրքի 300.1-րդ հոդվածի 1-ին մասով` ՀՀ սահմանադրական կարգը տապալելու մեջ, Յուրի Խաչատուրովը՝ քրեական օրենսգրքի 300.1-րդ հոդվածի 1-ին մասով` սահմանադրական կարգը տապալելու մեջ, իսկ Արմեն Գևորգյանը՝ քրեական օրենսգրքի 38-300.1-րդ հոդվածի 1-ին մասով, 311-րդ հոդվածի 4-րդ մասի 2-րդ կետով և 190-րդ հոդվածի 3-րդ մասի 1-ին կետով` սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու մեջ: