Տարոն Սիմոնյանի օրենսդրական նախաձեռնությունը

ԱԺ «Լուսավոր Հայաստան» խմբակցության պատգամավոր Տարոն Սիմոնյանը հանդես է եկել «Զինվորական ծառայության և զինծառայողի կարգավիճակի մասին» ՀՀ օրենքում լրացում կատարելու օրենսդրական նախաձեռնությամբ:

Նա իր ֆեյսբուքյան էջում գրել է.

«Հարգելի՛ հայրենակիցներ,

երեկ հանդես եմ եկել «Զինվորական ծառայության եւ զինծառայողի կարգավիճակի մասին» ՀՀ օրենքում լրացում կատարելու օրենսդրական նախաձեռնությամբ:

Այս նախաձեռնությամբ առաջարկում ենք, որ զինվորական ծառայությունից արձակված շարքային եւ սպայական կազմերի պարտադիր զինծառայողներն անցնեն առողջական վիճակի համալիր հետազոտություն եւ բժշկական փորձաքննություն զինվորական ծառայությունից արձակվելուց անմիջապես հետո: 
Եթե եզրակացությամբ հաստատվում է, որ անձի առողջական վիճակը վատթարացել է զինվորական ծառայության ընթացքում եւ պատճառով, ապա պետությունը պարտավորվում է ապահովել անձի առողջության առաջնահերթ եւ անվճար վերականգնումը։

Այս նախաձեռնությամբ լուծվում են մի քանի կարեւոր խնդիրներ՝

- անձի ազատում ոչ իր մեղքով, զինվորական ծառայության ընթացքում եւ պատճառով իր առողջության վատթարացման հետեւանքների վերացմանն ուղղված ֆինանսական ծախսերից,

- զինվորական ծառայության ընթացքում եւ պատճառով առաջացած առողջության վատթարացման պատճառահետեւանքային կապի որոշակիացում,

- զինվորական ծառայության անցնելիս պարտադիր բժշկական հետազոտության եւ դրա եզրակացության որակի բարձրացում,

- վեճերի լուծման վարչական եւ դատական ռեսուրսների խնայում,

- զինված ուժերի եւ պետության նկատմամբ հասարակության վստահության բարձրացում։

Հուսով եմ՝ քաղաքական մեծամասնությունն այս խնդրի լուծման հարցում համակարծիք կլինի մեզ հետ»: