Նոր զարգացումներ՝ «Սեքյուրիթի դրիմ»-ում

«Սեքյուրիթի դրիմ» ընկերության տնօրեն Արամ Ղլեչյանը հանցագործության վերաբերյալ հաղորդում է ներկայացրել նաև Ազգային անվտանգության ծառայություն: Այս մասին ԼՈւՐԵՐ.com-ին փոխանցեցին «Սեքյուրիթի դրիմ» ընկերությունից՝ տրամադրելով հաղորդման փաստաթուղթը: Ըստ դրա՝ Արամ Ղլեչյանը՝ իրականացնելով «Սեքյուրիթի դրիմ» ՍՊԸ-ի տնօրենի պարտականությունները, հայտնաբերել է՝ «Էլիպս Ջիէյ» ՍՊԸ կողմից «Սեքյուրիթի դրիմ» ՍՊԸ-ին ներկայացվել են ակնհայտ կեղծ հաշիվ ապրանքագրեր/հարկային հաշիվներ, որոնք կազմվել են «Էլիպս Ջիէյ» ՍՊԸ-ի հաշվապահ Սահականուշ Սահակյանի կողմից:

«Համաձայն ՀՀ ՃՈ և «Սեքյուրիթի դրիմ» ՍՊԸ միջև 15.02.2017 կնքված գույքի հավատարմագրային կառավարման պայմանագրի՝ ՃՈ-ն պետք է հատուցի հավատարմագրային կառավարչի փաստացի կատարած ծախսերը: Փաստացի չմատուցված, սակայն կազմված և «Սեքյուրիթի դրիմ» ՍՊԸ-ին ներկայացված հարկային հաշիվները «Սեքյուրիթի դրիմ» ՍՊԸ-ի կողմից ՃՈ-ին ներկայացվելու դեպքում Հայաստանի Հանրապետությունը կկրի առանձնապես խոշոր չափերի վնաս: Ինձ համար ակնհայտ է, որ նշված կեղծիքները թույլ են տրվել միտումնավոր, քանի որ կեղծ հաշիվ ապրանքագրերը և հարկային հաշիվները կազմող անձը հաստատապես տիրապետում է այն տեղեկատվությանը, որ ներկայացվող ծառայությունները չեն մատուցվել երբևէ՝ համապատասխան մասնագետների բացակայությամբ պայմանավորված»,- գրել է նա՝ ընդգծելով, որ չցանկանալով մասնակից լինել կատարվող հանցագործություններին, դիմում է Վանեցյանին՝ քրեադատավարական ընթացակարգերով նշված իրավահարաբերությունները պարզելու համար:

Ի դեպ, երեկոյան հայտնի դարձավ, որ ԱԱԾ-ն մեղադրանք է առաջադրել ՀՀ երրորդ նախագահ Սերժ Սարգսյանի եղբորը՝ Ալեքսանդր (Սաշիկ) Սարգսյանին, առանձնապես խոշոր չափերի խարդախության համար: Ըստ որոշ տեղեկությունների՝ այս ընկերությունը կապվում է վերջինիս անվան հետ, ուստի չի բացառվում, որ մեղադրանքն առնչվում է հենց այս գործին:

Նշենք, որ երեկ՝ մարտի 1-ին, «Սեքյուրիթի դրիմ»-ի տնօրենը ցուցմունք է տվել ընկերության հիմնադիրների՝ Ալեքսան և Գուրգեն Զաքարյանների դեմ այն մասին, որ ՃՈ կողմից՝ ամսական ստացված 70 միլիոն դրամից փաստացի ծախսվել է 27 միլիոն դրամը, իսկ 43 միլիոն դրամը յուրացվել՝ ՍՊ ընկերության հիմնադիրների կողմից:

Ավելի վաղ տեղեկացրել ենք՝ ընկերության աշխատակիցները գործադուլ են հայտարարել՝ արագաչափերի և տեսախցիկների վերահսկմամբ և տեղադրմամբ զբաղվող «Էլլիպս» և «Սեքյուրիթի դրիմ» ընկերության սեփականատերերից պահանջելով պարզաբանում՝ «Սեքյուրիթի դրիմ» ընկերության տնօրեն Արամ Ղլեչյանին աշխատանքից անհիմն հեռացնելու վերաբերյալ:   

Նշենք, որ Արամ Ղլեչյանը «Սեքյուրիթի դրիմ»-ի տնօրենի ժամանակավոր պաշտոնակատար դարձել է հեղափոխությունից հետո՝ փոխարինելով Կարեն Կարապետյանին: Նկատենք, որ դրանից առաջ Ոստիկանության 6-րդ գլխավոր վարչության աշխատակիցները մտել էին «Էլլիպս» ընկերություն: Սակայն այն ժամանակ ընկերության տնօրենի խորհրդական, փաստաբան Արամ Ղլեչյանը վստահեցնում էր, որ ընկերության սեփականատերերի կողմից ի սկզբանե եղել է խստագույն հանձնարարական՝ պահպանել օրենքի պահանջները. «Մեր հարգելի իրավապահները կասկածներ ունեին, որ «Սեքյուրիթի Դրիմ» ընկերությունը, որը ծառայություններ է ստանում նաև «Էլլիպս Ջի Էյ» ընկերությունից, ոչ ամբողջական հաշվետվություններ է ներկայացրել, որի արդյունքում, իրենց ենթադրությամբ, ամբողջ ֆինանսական միջոցները չէ, որ ունեն պատշաճ հիմնավորում: Մենք ներկայացրել ենք իրենց անհրաժեշտ տվյալներ, փաստաթղթեր, որոնցով հիմնավորվում է, որ մեր կողմից իրականացվել է բացառապես օրենքից բխող գործառույթ»,- ասել էր Արամ Ղլեչյանը:

Ըստ ոստիկանության հրապարակման՝ կատարած հատուկ գործողությունների արդյունքներով` «Սեքյուրիթի Դրիմ» և «Էլիփս» ընկերությունների տնօրինությունը հափշտակել էր շուրջ 1 մլրդ 15 մլն 869 հազար 600 հարյուր դրամ:

Սոնա Հարությունյան