Պայքար Հանրային ռադիոյի տնօրենի պաշտոնի համար. ովքեր են թեկնածուները

Ինչպես հայտնի է՝ փետրվարի 22-ին հայտարարվել է Հայաստանի Հանրային ռադիոյի գործադիր տնօրենի թափուր պաշտոնի համալրման մրցույթ: Ձևավորվել է հեռուստատեսության և ռադիոյի մրցութային նոր հանձնաժողով, որն էլ ընտրելու է նոր տնօրենին։ Նշենք, որ հանձնաժողովի կազմում են Լևոն Գալստյանը, Մերուժան Տեր-Գուլանյանը, Երվանդ Երզնկյանը, Սարգիս Նաջարյանը, Մարատ Օրդյանը։

ԼՈՒՐԵՐ.com-ի հետ զրույցում Հանրային հեռուստառադիոընկերության խորհրդի անդամ, Հանրային ռադիոընկերության գործադիր տնօրենի ընտրության մրցութային հանձնաժողովի քարտուղար Լևոն Գալստյանը նշեց, որ հայտերի ընդունումը դեռևս շարունակվում է:

«Մարդիկ գալիս, հայտեր են ներկայացնում: Այս պահին 21 անձ հայտ է ներկայացրել տնօրենի թափուր պաշտոնի համար, սպասենք, տեսնենք՝ ովքեր են ներկայացնում հայտեր: Մինչև մարտի 4-ը ներառյալ՝ ցանկացողները դիմելու հնարավորություն ունեն, իսկ արդեն մարտի 5-ին հանձնաժողովը կքննարկի ներկայացված հայտերը: Մենք պետք է կշռադատենք ամեն բան, ծանրութեթև անենք, տեսնենք, թե ով է լավագույնս համապատասխանում ներկայացվող պահանջներին, ըստ այդմ՝ քվեարկությամբ կկայացնենք որոշում»,-ասաց նա՝ ընդգծելով, որ կանխակալ նախապատվություններ չկան և ճիշտ չէ տարբերություն դնել ավագ և երիտասարդ սերնդի ներկայացուցիչների միջև:

Ըստ Գալստյանի՝ թեկնածուները ներկայացնում են ինքնակենսագրություն, որում պետք է նշված լինի տվյալ ոլորտին իրենց առնչության մասին։

Հարցին՝ արդյոք լարվածություն կա՞ թեկնածուների միջև, Գալստյանը վստահեցրեց, որ ինքը նման բան չի նկատել: 

Ստորև ներկայացնում ենք մինչ օրս Հանրային ռադիոյի տնօրենի թափուր հաստիքի համար հայտ ներկայացրած 21 թեկնածուների անունները. 

1. Մհեր Մարգարյան
2. Տիգրան Հարությունյան
3. Իրինա Բարսեղյան
4. Հովհաննես Թովմասյան
5. Արթուր Իսպիրյան
6. Գրիգոր Նազարյան
7. Դիանա Հարությունյան
8. Ստեփան Զաքարյան
9. Լավրենտի Միրզոյան                                          
10. Մարինա Թագակչյան
11. Դավիթ Սարգսյան
12. Հայկ Հովհաննիսյան
13. Հռիփսիմե Հովհաննիսյան
14. Գարեգին Խումարյան
15. Ալեքսանդր Սայադյան
16. Լուսինե Քոչարյան
17. Վահե Հայրապետյան
18. Վարդգես Ավետիսյան
19.  Լիլիթ Մելքոնյան
20. Արման Գալոյան
21. Վրույր Թադևոսյան

Նշենք, որ մրցույթին կարող են մասնակցել ՀՀ այն քաղաքացիներն, ովքեր լրագրության, իրավագիտության և/կամ հեռուստառադիոհեռարձակման կառավարման բնագավառում հեղինակավոր և որակյալ մասնագետ են, գիտության, մշակույթի և/կամ արվեստի գործիչ, ունեն բարձրագույն կրթություն և տիրապետում են հայոց լեզվին:

Հիշեցնենք, որ այդ պաշտոնը թափուր է 2018թ. դեկտեմբերի 19-ից՝ Հանրային ռադիոյի նախկին տնօրեն Մարկ Գրիգորյանի հրաժարականից հետո: Հանրային ռադիոյի մի խումբ աշխատակիցներ նամակ-պահանջագիր էին տարածել՝ պահանջելով, որ Գրիգորյանը հրաժարական ներկայացնի, հակառակ դեպքում, նրանք սպառնում էին դիմել գործադուլի։

Սոնա Հարությունյան