Արհեստածին տոն` Ապրիլի 24-ից առաջ. ճիշտ չէ՛

Հաջորդ հինգշաբթի կառավարության նիստում կքննարկվի ապրիլի 23-ը՝ Սերժ Սարգսյանի հրաժարականի օրը,  Քաղաքացու օր հռչակելու նախձեռնությունը։ 

Ապրիլի 23-ն այլ խորհուրդ ունի Հայ հեղափոխական դաշնակցության համար։ Արդեն 20 տարուց ավելի է ապրիլի 23-ին ՀՅԴ-ն Երեւանում կազմակերպում է ավանդական դարձած ջահերով երթ՝ ոգեկոչելու 1915 թվականի Հայոց ցեղասպանության զոհերի հիշատակը։ Բազմաթիվ քաղաքացիներ՝ հիմնականում երիտասարդներ, ինչպես նաև սփյուռքահայեր, Ազատության հրապարակից ջահերով եւ մոմերով շարժվում են դեպի Ծիծեռնակաբերդի հուշահամալիր։ Այս մասին ԼՈՒՐԵՐ․com-ի թղթակցի հետ զրույցում ասաց ՀՅԴ Հայաստանի ԳՄ ներկայացուցիչ Իշխան Սաղաթելյանը։

Նա հայտնեց, որ այդ նախաձեռնության մասին ՀՅԴ-ն պաշտոնական հայտարարությամբ հանդես կգա, հետևաբար շատ չմանրամասնելով միայն նշեց․ «Մենք գտնում ենք՝ Հայոց ցեղասպանության հիշատակի օրից մեկ օր առաջ տոն օր հռչակելու կարիքը և անհրաժեշտությունը չկա։ Դա շատ արհեստածին նախաձեռնություն է և հիմնավորում չկա»։

Իսկ ՀՀԿ խոսնակ, ԱԺ նախկին փոխխոսնակ Էդուարդ Շարմազանովը նկատեց, որ իր համար ապրիլին տեղի ունեցած դեպքերը ոչ թե հեղաշրջում էր, այլ իշխանազավթում, որը տեղի է ունեցել շանտաժի և սպառնալիքի ալիքի տակ։

«Այս 10 ամիսները ցույց տվեցին, որ ապրիլին տեղի ունեցածը որևէ կապ չունի ժողովրդի, ազգի և պետության շահերի սպասարկման հետ։ Որևէ ոլորտում փոփոխություն չկա՝ կոռուպցիան կա, մարտի մեկն ասում են բացահայտված է՝ բացահայտված չէ, մամուլի նկատմամբ հարձակումներ են, մասշտաբային օպտիմալացում է` նախարարությունները փակեցին, հիմա էլ մարզպետարանների 30 տոկոսն են կրճատում, Ալավերդու գործարանը առ այսօր չի աշխատում․ 700 հոգի գործազուրկ է, այս է Նիկոլի Հայաստանը»,- նշեց Էդուարդ Շարմազանովը։

Վերջինիս համար կառավարության գրեթե բոլոր նախաձեռնությունները խնդրահարույց են․ «ժամանակը ցույց է տվել, որ մարդիկ ի զօրու չեն իրականցնել այն գործառույթները, որոնք կան, այս կառավարությունը՝ Նիկոլի գլխավորությամբ, քայլող տեսարաններ և շոուներ սարքողն են․ իրենք այլ բան ի զօրու չեն»,- ընդգծեց Շարմազանովը։

Վերադառնալով ապրիլի ապրիլի 23-ին տոն օր հռչակելու նախաձեռնությանը՝ Շարմազանովը նկատեց, որ առհասարակ դա ճիշտ չէ, իսկ ապրիլի 24-ին նախօրյակին՝ կրկնակի ճիշտ չէ։

Հիշեցնենք, որ ապրիլի 23-ին՝ Հայաստանում սկսված ցույցերի ու հանրահավաքների 11-րդ օրը, Սերժ Սարսգյանը տվել էր հրաժարական, որից հետո Հայաստանում տեղի ունեցավ իշխանափոխություն և ՀՀ վարչապետ ընտրվեց Նիկոլ Փաշինյանը։

Արմինե ԱՐՄԵՆԱԿՅԱՆ