Սիրիահայերը դժգոհում են «Արմավիայի» սահմանած գներից

Սիրիահայերը բողոքում են, որ չեն կարողանում Հայաստան գալ ազգային փոխադրող «Արմավիա»-ի սահմանած բարձր գների պատճառով։ Այսօր այս մասին հայտնեց Հանրային խորհրդի Երիտասարդական ենթահանձնաժողովի նախագահ Հռիփսիմե Մարգարյանը, ով կարծում է՝ զեղչային համակարգ ստեղծելու կարիք կա։ Որևէ փոփոխություն չլինելու դեպքում նամակով կդիմեն ՀՀ տրանսպորտի եւ կապի նախարարությանը:

Իսկ ասուլիսի մյուս բանախոս Հարութ Փալուլյանը հայտնեց, որ «Սիրիական» ընկերության չվերթների տոմսերը մոտ 320 դոլար են, և հնարավորություն կա միայն մեկ ուղղությամբ տոմս գնելու, իսկ «Արմավիա»-ի գները՝ 470-480 դոլար արժեն և հնարավորություն չկա մեկ ուղղությամբ տոմս գնելու.«Եթե նույնիսկ չվերադառնաս, տոմսդ չես կարող հետ վերադարձնել, իսկ Երևան-Հալեպ մեկ ուղղությամբ «Արմավիա»-ն տոմս տրամադրում է 380 դոլարով»։

Խոսելով Սիրիայում տիրող իրավիճակի մասին' Փալուլյանը նշեց, որ եթե Բաշար Ալ-Ասադը մնա իշխանության, հայերի համար շատ լավ կլինի, իսկ եթե փոխվի իշխանությունը, հայկական համայնքի վիճակը կբարդանա: