Ինչքանո՞վ է իրատեսական գյուղական խանութներում նոր սերնդի ՀԴՄ-ների կիրառումը

Այսօր` մարտի 25-ին, Աժ տնտեսական հարցերով մշտական հանձնաժողովի նիստի ընթացքում ՊԵԿ նախագահ Դավիթ Անանյանը հայտարարեց, որ բոլոր տնտեսվարողները պետք է օգտվեն նոր սերնդի ՀԴՄ կտրոն տպող սարքերից` նշելով, որ դրանք մի շարք լայն հնարավորություններ ունեն և կնպաստեն տնտեսվարողների կողմից հարկերի ճիշտ վճարմանը: «Իմ քայլը» խմբակցության պատգամավոր Գևորգ Պապոյանը, դիմելով ՊԵԿ նախագահին, նշեց, որ իրեն հուզում է, թե կա՞ արդյոք մեխանիզմ` գյուղական միջավայրի տնտեսվարողներին հսկելու համար: Պարզվեց` գործիք, որպես այդպիսին՝ չկա, որ հսկի գյուղերում գործող ՓՄՁ-ներին:

ԼՈւՐԵՐ.com-ի հետ զրույցում Գևորգ Պապոյանը, անդրադառնալով իր բարձրացրած խնդրին, ասաց.

«Մեխանիզմը, ըստ երևույթին, միջազգային հանրության մեջ գործող ազնվության և արդարության սկզբունքն է: Մենք հիմա պիտի աշխատենք երկու ուղղությամբ` համաձայնենք և թողնենք, որ այդ մշակույթը մեր մեջ էլ զարգանա, կամ մտածենք և գործիքներ ներդնենք այդ ուղղությամբ: Այս դեպքում գործիքներ դնելը ոչ հաճելի մեթոդ է, այս պահին մենք աշխատում ենք արդարության և ազնվության մեթոդը ձևավորելու ուղղությամբ»:

Հարցին, թե ՀԴՄ նոր սերնդի սարքերով ի՞նչ մեխանիզմով պիտի աշխատեն գյուղական խանութները այն դեպքում, երբ գյուղերում հատկապես տարածված է ապառիկով (նիսյա) գնումներ անելու տարբերակը, պատգամավորը պատասխանեց.

«Համամիտ եմ, պարտքի տարբերակը կա, բայց շատ է ուռճացվում: Այնպես չի, որ գյուղերում հիմա առևտուրը այնպիսին է, ինչպիսին, օրինակ՝ տասից քսան տարի առաջ էր: Եթե այստեղ գլոբալ խնդիրը լիներ պարտքերի տարբերակը, ապա ես համաձայն կլինեի, որ թեկուզ պարտքով գնումներ կատարող ծերերին ՀԴՄ կտրոններ չլիներ, բայց դա չէ գլխավոր խնդիրը: Այստեղ առաջնային խնդիր է այն, որ գյուղերում բոլորը միմյանց ճանաչում են և վաճառողը վստահ է, որ իր համագյուղացի գնորդը հարկային տեսչությունից չէ և որևէ կապ չունի` կտրոն չի տրամադրում: Մենք խնդիր ունենք արդարության սկզբունքի և ավելի շատ պիտի վաճառողի մոտ ձևավորենք ազնիվ առևտրի մշակույթը, որպեսզի նա տա կտրոն` մինչ գնորդը կպահանջի կամ չի պահանջի: Այս առումով, ես կարծում եմ, որ այս մեխանիզմի ձևավորման պատասխանատվությունը պետք է դրվի ավելի շատ հենց տրամադրողի վրա: Յուրաքանչյուրը պետք է հասկանա, որ որպես հարկ վճարած գումարները տարբեր առումներով նպաստում են պետության զարգացմանը: Այս գիտակցությունը երբ ունենանք, կունենանք նաև այդ մշակույթը»:

Սիլվի ՏԻԳՐԱՆՅԱՆ