«Բոգոյի կողքի լակոտ-լուկուտները սեփական մեքենաներով ուղևորափոխադրումներ են անում». գծատերը բողոքում է

Տևական ժամանակ է Երևան-Արմավիր երթուղու վարորդները բողոքի ակցիաներ են իրակակացնում կառավարության շենքի դիմաց, այսօր նրանց է միացել երթուղին սպասարկող «Գալակտիկա տրանս սերվիս» ՍՊԸ տնօրեն Շուշանիկ Խաչատրյանը։  ԼՈւՐԵՐ․com-ի հետ զրույցում Շուշանիկ Խաչատրյանը փոխանցեց, որ անօրինական ուղևորափոխադրումներ իրականացնող մեքենաները «խփում են իր գործին», ինչի հետևանքով ինքը հասել է սնանկացման․

«Գրեթե մեկ տարի է ինչ հիմնարկս չի աշխատում։ Արմավիր-Երևան գիծը ինձ պատկանող ընկերությունն է շահել տենդերով ու հիմա չեմ կարողանում աշխատել այն պատճառով, որ գծի վրա իրենց մեքենաներն են դրել ինչպես Ռուբեն Կոստանյանը (Նորագյուղցի Բոգո), այնպես էլ այլ ուղևորափոխադրողներ, որոնք չեն թողնում աշխատել: Անընդհատ Ռուբեն Կոստանյանի անունն է հոլովվում, քանի որ իր մեքենաների քանակը շատ-շատ է, ինքն է 7 տեղանի վիտոներ աշխատացնում, ինքն է ստիպում կամ հրահանգում, որ իր կողքի լակոտ-լուկուտները, չգիտեմ էլ՝ ովքեր են, ոնց անվանեմ, իրենց սեփական մեքենաները տաքսի դարձրած ուղևորափոխադրումներ են անում՝ չհաշված 40-ից ավել միկրոավտոբուսներ սպիտակ, դեղին, քաղաքային համարներով»,- նշեց նա:

Երկար ժամանակ է խնդրի մասին բարձրաձայնում եք, նոր ղեկավարությունը չի՞ փորձում ինչ-որ կերպով լուծում գտնել՝ հարցին ի պատասխան Խաչատրյանն ասաց, որ հեղափոխությունից հետո իրար հետևից նախարարներ են փոխվում և ոչինչ չեն հասցնում անել. «Մինչև մեկը ընտելանում է, փոխվում է, հիմա ուրիշներն են: Էդպես էլ ամեն մեկն ասում է սպասի-սպասի հարցին լուծում կտանք: Այսօր ինձ ասում են՝ 3 ամիս սպասի, 1-2 օպերատորով պետք է աշխատի գիծը, բայց մեկ տարի սպասել եմ, հիմնարկս սնանկացել է, չէ՞ որ ես պարտավորություններ ունեմ»,- ասաց նա՝ նշելով, որ վարորդների աշխատավարձերը չի կարողանում վճարել: 

Շուշանիկ Խաչատրյանի խնդրանքն այն է, որ վարչապետը 10 րոպե ժամանակ տրամադրի, որպեսզի նրան իրականաությունն ասեն. «Ես համոզված եմ, որ իրեն իրականությունը չեն ներկայացնում: Չնայած՝ սա վարչապետի լուծելու խնդիրը չէ, սա նախարարության խնդիրն է, որ վաղուց պետք է լուծած լիներ, բայց ոչինչ չի անում»,- ասաց Խաչատրյանը:

Մեզ հետ զրույցում «Հայավտոկայարան» ՓԲԸ-ի գործադիր տնօրեն Աշոտ Մնացականյանն էլ, անդրադառնալով Կիլիկիա ավտոկայանից այլ ուղղություններ անօրինական ուղևորափոխադրումներ իրականացնող մեքենաներին, ասաց․ «Ձեր նշած մեքենաները ուղևորափոխադրումները չեն իրականցնում ավտոկայանի տարածքից, ինչով արդեն իսկ տվյալ խնդիրը դուրս է մեր իրավասություններից։ ՀՀ տարածքում գործող օրենսդրությամբ տվյալ խնդրի կարգավորումը գտնվում է տվյալ ոլորտը համակարգող տեսչական մարմնի վերահսկման տիրույթում»,- նշեց նա։

Սոնա Հարությունյան