Մարտեր Դամասկոսի համա՞ր

Ինչպես արդեն հաղորդել էինք, Սիրիայի մայրաքաղաք Դամասկոսում այս պահին ծանր մարտեր են ընթանում երկրի կառավարական զորքերի և ապստամբների միջև: BBC-ի հաղորդմամբ՝ այս պահին մարտերը հասել են մինչև Դամասկոսի հարավում գտնվող Միդան թաղամասը, ուր ժամեր առաջ ուղարկվել էին կառավարական զրահատեխնիկայի մի քանի զորասյուներ:

Այսպիսով՝ մարտական գործողությունները տեղի են ունենում Սիրիայի պառլամենտի շենքից շուրջ 3, իսկ նախագահի նստավայրից` շուրջ 6 կմ հեռավորության վրա: France-presse-ի հաղորդմամբ՝ այս պահին կառավարական զորքերը ականանետներով ռմբակոծում են Միդանը, իսկ զրահատեխնիկան փորձում է պաշարել այն: Դամասկոսում ամենուրեք լսվում են կրակահերթեր ու պայթյուններ: Սպանվածների ու վիրավորների մասին տեղեկությունները տարբեր են և դեռ անորոշ:

Մի շարք  միջազգային պարբերականներ արձանագրում են, որ տեղի ունեցողը ճակատամարտ է Դամասկոսի համար և չեն բացառում Դամասկոսի գրավումը ապստամբների կողմից՝ նշելով, որ քաղաք մտնելու օպերացիան բավականին լավ նախագծված էր:

Նշենք, որ Կարմիր խաչի միջազգային կոմիտեն օրերս հայտարարել է, թե ամբողջ Սիրիայի տարածքում քաղաքացիական պատերազմի ռեժիմ է համարում, ինչը նշանակում է, որ պատերազմող կողմերը պետք է հետևեն ժնևայն կոնվենցիայի դրույթներին:

Հիշեցնենք, որ Սիրիայում բնակվում է շուրջ 190 հազար հայ, որոնց մեծ մասը չկարողացավ տեղափոխվել Հայաստան: Համաձայն ԶԼՄ-ների հրապարակումների՝ Սիրիայում Հայաստանի Հանրապետության դեսպանատունը աշխատում է սովորական ռեժիմով: