Ինչու է Արմավիրի մարզպետն ազատել Մ. Մեխակյանի անվան դպրոցի տնօրենին

ՀՀ Արմավիրի մարզպետ Համբարձում Մաթևոսյանի ապրիլի 4-ի համապատասխան որոշմամբ` դադարեցվել են Արագածի Մ. Մեխակյանի անվան միջնակարգ դպրոց պետական ոչ առևտրային կազմակերպության տնօրեն Անդրանիկ Նահապետյանի լիազորությունները, լուծվել է նրա հետ 2019 թվականի հունվարի 17-ին կնքված աշխատանքային պայմանագիրը: 

ԼՈՒՐԵՐ․com-ի հետ զրույցում Արմավիրի մարզպետարանի իրավաբանական բաժնի պետ Լիաննա Հարությունյանն ասաց, որ Անդրանիկ Նահապետյանի տնօրենի պաշտոնից ազատման հիմքը եղել է Կրթության և գիտության նախարարության և ԱԺ «Իմ քայլը» դաշինք խմբակցության պատգամավոր Սոֆյա Հովսեփյանի կողմից ներկայացված գրությունը․ «Համագյուղացիների և դպրոցի աշխատակիցների կողմից դիմում բողոքների հիման վրա դպրոցում ստուգումներ են անցկացվել Կրթության տեսչության կողմից,  ուսումնասիրելուց հետո ԿԳՆ-ից մարզպետարան գրություն է ուղարկվել, որ մրցույթն անցկացրած խորհուրդը լեգիտիմ չէ եղել, այսինքն՝ ձևավորված է եղել օրենքի խախտումով»,- նշեց նա։ 

Նրա խոսքով՝ առաջարկվել է համապատասխան իրավական ակտով ուժը կորցրած ճանաչել դպրոցի մրցույթի անցկացման հայտարարության որոշումը, որից հետո օրենքի սխալ նշանակման հիմքով պաշտոնից ազատվել է տնօրենը։

Նշենք, որ մրցույթն իրականացվել է 2018թ․ դեկտեմբերի 24-ին, իսկ թե ե՞րբ է նախատեսվում տնօրենի թափուր հաստիքի համար նոր մրցույթ անցկացնել, Հարությունյանն ասաց, որ դեռևս հայտնի չէ․ «Թափուր տեղառաջանալուց հետո եռօրյա ժամկետում խորհուրդը նիստ է հրավիրում տեղեկացնելու լիազոր մարմնին ընթացքի մասին, դեռևս հայտնի չէ՝ երբ է խորհուրդը պատրաստվում, սակայն ժամկետների պահպանում անպայման մեր կրթության վարչությունն իրականացնում է: Այս ամենից հետո խորհրդի կազմը փոփոխվել է, քանի որ ժամկետը լրացել էր, քանի որ ԿԳ նախարարի հրամանով կոլեգիալ կառավարման մարմինը 3 տարի ժամկետով է ընտրվում»,- նշեց նա։ 

Սոնա Հարությունյան