Աղավնաձորի ճամբարում տարբեր երկրներից հյուրընկալվել էին շուրջ 180 երիտասարդներ

Հուլիսի 20-ին Աղավնաձորի ճամբարում կայացավ ՀՀ սփյուռքի նախարարության «Արի տուն» համահայկական երիտասարդական ծրագրի 4-րդ փուլն ամփոփող «Ես քո զավակն եմ Հայաստան» խորագրով գրական, երաժշտական երեկույթ: Ներկա էին Արցախյան ազատամարտի հերոս Արկադի Տեր-Թադևոսյանը (Կոմանդոս), մշակույթի և արվեստի գործիչներ:

ՀՀ սփյուռքի նախարար Հրանուշ Հակոբյանը ջերմորեն ողջունեց երիտասարդներին և շնորհակալություն հայտնեց «Արի տուն» ծրագրի 4-րդ փուլի մասնակիցների ծնողներին, ուսուցիչներին և նրանց համայնքների ղեկավարներին՝ երիտասարդների Հայրենիք այցի համար:

Արկադի Տեր-Թադևոսյանը ևս ողջունեց սփյուռքահայ երիտասարդներին՝ մասնավորապես նշելով, որ նրանք պետք է հպարտ լինեն ուժեղ և պաշտպանված Հայրենիք ունենալու համար և իմանան, որ նրանք են մեր Հայրենիքի ապագա անվտանգության երաշխավորները:

Ողջույնի և շնորհակալական խոսքով հանդես եկավ նաև Նիկոսիայի (Կիպրոս) «Նարեկ» վարժարանի հայոց լեզվի և գրականության ուսուցիչ Մագի Հալաջյանը՝ շեշտելով, որ «Արի տուն» ծրագիրը լիովին ծառայում է իր նպատակին և առաքելությանը:

Միջոցառմանը կատարումներով հանդես եկավ նաև «Հայկազունք» գուսանա-աշուղական համույթը և այն ավարտվեց Ճամբարային խարույկի մոտ:

Աղավնաձորի ճամբարում այս անգամ հյուրընկալվել էին աշխարհի տարբեր երկրներից ժամանած շուրջ 180 երիտասարդներ, որոնք վերադառնալով բնակության երկրներ՝ կտանեն իրենց հետ Հայրենիքի շունչը, մայր հողի ուժը և ջերմ ու բարի հիշողություններ Հայաստանում անցկացրած օրերից: