Արիտունցիներին հյուրընկալել է Երևանի քաղաքապետը

ՀՀ սփյուռքի նախարարության «Արի տուն» ծրագրի 5-րդ փուլի մասնակիցները հուլիսի 23-ին ՀՀ սփյուռքի նախարար Հրանուշ Հակոբյանի ուղեկցությամբ եղան Երևանի քաղաքապետարանում, որտեղ նրանց ընդունեց Երևանի քաղաքապետ Տարոն Մարգարյանը:

Նախարար Հ.Հակոբյանը, շնորհակալություն հայտնելով Երևանի քաղաքապետարանին և վարչական շրջանների աշխատակազմերին մեր երեխաների տունդարձը Հայրենիք այսքան սիրով կազմակերպելու համար, նշեց, որ. «անցնող 4 տարիներին Երևանն է եղել այն հիմնական տունը, ուր եղել և հիացել են մեր երեխաները»:

Երևանի քաղաքապետ Տ.Մարգարյանը, ողջունելով «Արի տուն» ծրագրի մասնակիցներին, համոզված էր, որ տուն դառնալուց հետո նրանք սկսելու են հաշվել օրերը, թե երբ են կրկին գալու Հայաստան' հավելելով, որ. «Հայրենիքը, Երևանը, միշտ սպասում են ձեզ»:

«Արի տուն» ծրագրի մասնակիցները ստացան Երևանի մասին տպագիր հուշանվերներ և հանդես եկան իրենց պատրաստած մշակութային փոքրիկ ծրագրով, ապա այցելեցին Երևան քաղաքի պատմության թանգարան: