Մեկնարկեց «Արի տուն» ծրագրի հինգերորդ փուլը

Հուլիսի 23-ին ՀՀ սփյուռքի նախարարությունում մեկնարկեց «Արի տուն» 2012թ. համահայկական երիտասարդական ծրագրի հինգերորդ փուլը, որին կմասնակցի աշխարհի 16 երկրներից ժամանած ավելի քան 200 երիտասարդ: Ներկա էին Երևանի վարչական շրջանների, տեղական ինքնակառավարման մարմինների, Սփյուռքի հայ համայնքների, ինչպես նաև հյուրընկալ ընտանիքների ներկայացուցիչներ, «Արի տուն» 2012թ. ծրագրի հինգերորդ փուլի մասնակիցները:

Ողջունելով ներկաներին և ազդարարելով «Արի տուն» 2012թ. ծրագրի հինգերորդ փուլի մեկնարկը' ՀՀ սփյուռքի նախարար Հ.Հակոբյանը ներկայացրեց ծրագրի միջոցառումները և հորդորեց Հայրենիքում անցկացնելիք օրերի ընթացքում միմյանց հետ շփվել միայն հայերենով, համայնք վերադառնալուց հետո նպաստել հայապահպանությանը և հավատարիմ մնալ հայ ինքնությանը: Ծրագրին աջակցելու համար նախարար Հ.Հակոբյանը շնորհակալություն հայտնեց պետական և տեղական ինքնակառավարման մարմինների ներկայացուցիչներին, հյուրընկալ ընտանիքներին:

Շնորհակալություն հայտնելով ՀՀ սփյուռքի նախարարությանը ծրագրի իրականացման համար' Սփյուռքի մեր հայրենակիցները մասնավորապես նշեցին, որ այն միացնում է աշխարհասփյուռ հայությանը:

5-րդ փուլի մասնակիցները մեծ ոգևորությամբ ասմունքեցին և երգեցին, իսկ միջոցառման ավարտին ներկաները դիտեցին «Արի տուն» ծրագրի մասին ֆիլմ: