ՀՀ-ն պարտավոր է պատրաստ լինել ընդունելու սիրիահայ փախստականներին. Ստյոպա Սաֆարյան

«Ժառանգություն» կուսակցության գլխավոր քարտուղար Ստյոպա Սաֆարյանը այսօր խոսել է տարածաշրջանային զարգացումների մասին աշխարհաքաղաքական գործընթացների համատեքստում։ Անդրադառնալով Սիրիայում տեղի ունեցող գործընթացներին՝ նա նշել է.

«Սիրիայի զարգացումները միանգամայն կանխատեսելի էին, դեռևս մեկ տարի առաջ փորձագետները զգուշացնում էին, որ արաբական աշխարհում տեղի են ունենում զարգացումներ, երբ արաբական երկրներն որոշակի հաջորդականանությամբ հայտնվում են հեղափոխության հորձանուտում։ Կասկած չի հարուցվում այն փաստը, որ այժմ Սիրիայի ստատուս քվոն արդեն խախտել է, իսկ ռեժիմի փոփոխությունը անխուսափելի է»։

Ստյոպա Սաֆարյանը ավելացրել է նաև, որ զինված ընդդիմությունը կոնֆլիկտը դարձնում է արյունալի և անշրջելի։ Այս համատեքստում Հայաստանի կողմից ցուցաբերվում է լռություն, իսկ Կառավարությունը անպատրաստ է Սիրիայում հայազգիների տարհանումը կազմակերպելու համար։ Իսկ, ահա, Ստյոպա Սաֆարյաի խոսքով, զարգացումները լուրջ վտանգներ են ստեղծում ու ստեղծելու են սիրիահայերի համար։ Նրա խոսքով, սփյուռքահայերի աջակցությունը «Արի տուն» ծրագիրը չէ կամ կեղծ վերաբերմունքը ու պաթետիկ ճառերը, այլ ՀՀ-ն պարտավոր է պատրաստ լինել ընդունելու սիրիահայ փախստականներին։

«Պիտի հասկանանք, որ սիրիական խնդիրը մասամբ պայմանավորված է Իրանի հարցով։ Զարգացումների հաջորդ հանգրվանը Իրանն է։ Մոտենում է այն տեսական ժամկետը, որի մասին կանխատեսումները արվել են նախկինում։ Եթե միջուկային ծրագրի փորձարկումները շարունակվեն, ապա Իրանը կարող է 2012-2013 թթ ընթացքում դառնալ միջուկային գերտերություն, իսկ այդ ժամկետը դեպի իրեն է քաշում գործընթացները, որքան մոտենանք կանխատեսված ժամանակամիջոցին, այնքան արյունալի կդառնան զարգացումները»,- ասել է նա՝ նշելով նաև, որ առաջիկայում մեր տարածաշրջանը եվրոպակացման միտում ունի՝ երկրորդացնելով Ռուսաստանի դերը։ Բանախոսի կարծիքով, Հայաստանը որպես շրջափակված ցամաքային երկիր, կհայտնվի դժվարին վիճակի մեջ, իսկ քաղաքական էլիտայի կողմից բացակայում են այս զարգացումների մասին արձագանքները։ 

«Դժգոհ եմ նաև միջազգային ատյաններում Արցախի խնդրի քննարկումից, ինչպես նաև ԼՂՀ նախագահական ընտրությունների մասին եվրոպական կառույցների հայտարարություններից, ուր չկար քննադատություն, այլ միայն գնահատական, որ ընտրությունները չեն կարող ոչ մի դերակատարում ունենալ Ղարաբաղի խնդրի լուծման մեջ»,- եզրափակել է Ստյոպա Սաֆարյանը։