«Ես ՀՀ առաջին գործարար տիկինն եմ և, կարելի է ասել, գործարար տղամարդը»․ Սիլվա Համբարձումյան

«Դատավարությունը հետաձգվում է, քանի որ ընդգրկված են բավականին մեծ թվով մարդիկ, որոնցից 3-4-ը փախած են, մեկը կալանավորված է, մեկը ստորագորությամբ է շրջում Հայաստանում։ Ամենակարևոր դեմքը Արամ Հարությունյանն է, որին չեն կարողանում գտնել։ Չեն կարողանում գտնել նաև Սուրեն Ավագյանին և Սևանի գժանոց-հիվանդանոցի տնօրեն Գագիկ Կարապետյանին, որին ԱՄՆ-ում կարծեմ կալանավորել են։ Սուրեն Ավագյանն ու Արամ Հարությունյանը փախած են, հետախուզման մեջ են գտնվում, բայց բոլորը պնդում են, որ Արամ Հարությունյանը գտնվում է ՀՀ-ում»,- այս մասին այսօր՝ դատական նիստից հետո, լրագրողների հետ զրույցում ասաց գործարար Սիլվա Համբարձումյանը։ 

Նա նշեց, որ 2-րդ նախագահ Ռոբերտ Քոչարյանի կողմից զրպարտության համար դատի ծանուցագիրը մինչ օրս չի ստացել․ «Ես երբեք զրպարտությամբ չեմ զբաղվել։ Ես ՀՀ առաջին գործարար տիկինն եմ և, կարելի է ասել, գործարար տղամարդը։ 1990-ականներից բիզնեսով եմ զբաղվել, և նման դեպք չի եղել։ Ես կրիշ չեմ ունեցել, որ ինձ էսքան օգներ, առաջ տաներ. ես իմ խելքով և ուժերով եմ առաջ գնացել։ Եթե ինչ-որ մեկն ինձ տանիք հանդիսանար, ես կաշառք չէի փոխանցի։ Տանիք չունեի և պարտավոր էի դա անել, որ կարողանայի հանրապետությունում աշխատել»,- ասաց Համբարձումյանը։  

Հիշեցնենք, որ Արամ Հարությունյանը 2007 թ․ եղել է բնապահպանության նախարար: Նա մեղադրվում է հանքերի շահագործման լիցենզիայի տրամադրման դիմաց գործարար Սիլվա Համբարձումյանից առանձնապես խոշոր չափի` 14 միլիոն դոլար, կաշառք ստանալու և փողերի լվացման համար։ Արամ Հարությունյանն այժմ հետախուզման մեջ է: Այս գործի վարույթը տարիներ առաջ կասեցվել էր և վերաբացվել 2018թ.-ին՝ նոր երևան եկած հանգամանքի հիմքով: