3248 սիրիահայ դիմել է՝ ՀՀ քաղաքացիություն ստանալու

2012թ. առաջին 6 ամիսներին Հայաստանի քաղաքացիություն ստանալու համար դիմել է Սիրիայի 3248 քաղաքացի, որոնցից 2957-ը ՀՀ արտգործնախարարության միջոցով, 291-ը՝ ՀՀ ոստիկանության Անձնագրային և վիզաների վարչություն:

Ինչպես հաղորդում է «Փաստինֆո» գործակալությունը, դիմածների 99 տոկոսն ազգությամբ հայեր են:

ՀՀ տարածքային կառավարման նախարարության միգրացիոն պետական ծառայության (ՄՊԾ) ապաստանի հարցերի բաժնից հայտնում են, որ տարեսկզբից մինչև հուլիսի 26-ը Հայաստանում փախստականի կարգավիճակ ստանալու խնդրանքով դիմել են սիրիահայ 18 ընտանիքների 37 անդամներ: Բոլոր դիմումները բավարարվել են: Ըստ նույն աղբյուրի, սիրիահայերի մի մասը գերադասում է բնակվել հարազատների, բարեկամների բնակարաններում, իսկ կացարան տրամադրելու խնդրանքով բոլոր դիմումները ՄՊԾ-ի կողմից բավարարվում են:

Հիշեցնենք, որ ՀՀ կառավարության հուլիսի 26-ի նիստում ընդունված որոշմամբ, դյուրացվեց սիրիահայերին վիզա տրամադրելու գործընթացը: Նրանք կարող են Հայաստանի մուտքի վիզա ստանալ ոչ միայն Սիրիայում գործող Հայաստանի դիվանագիտական ներկայացուցչություններում, այլև՝ Հայաստանի սահմանին: