«Արի տուն»-ի մասնակից սիրիահայ աղջիկը բարձրաձայնել է սիրիահայության խնդրի մասին

Այսօր Սփյուռքի նախարարությունում տեղի ունեցավ «Արի տուն» ծրագրի 6-րդ փուլի մեկնարկի միջոցառումը։ Այս փուլին մասնակցում է շուրջ 160 հայ երիտասարդ Սիրիայից, Իրանից, Վրաստանից, Ֆրանսիայից, Գերմանիայից, Հոլանդիայից, Ռուսաստանից, Ուկրաինայից, Բելառուսից։

Մասնակիցներին ողջույնի խոսք ուղղեց ՀՀ սփյուռքի նախարար Հրանուշ Հակոբյանը։ «Դուք կլինեք մի շարք պատմական վայրերում, և երբ վերադառնաք ձեր ծննդավայր, փորձեք խոսել Հայաստանի մասին ու ներկայացնել այն ձեր ընկերներին, հասակակիցներին: Շնորհակալություն հայաստանյան ընտանիքներին, որ այսքան սիրով ընդունում են սփյուռքի մեր երեխաներին: Մենք անում ենք ամեն ինչ, որ այս տասը օրերը ձեզ համար անմոռաց դառնան»,-ասաց նա։

Նախարարը հորդորեց այս տասը օրերի ընթացքում ձեռք բերել ընկերներ ու բարեկամներ, ապա հույս հայտնեց, որ այդ բարեկամությունը կլինի հավերժ, իսկ հանդիպման վայրն ամեն տարի կլինի Հայաստանը:

Բացման արարողության ժամանակ Սիրիայից ժամանած Լուսին խոսեց սիրիահայերի խնդրի մասին։ «Սիրիայում վիճակը վատ է, մարդկանց գործը լավ չէ: Եթե տոմսերը էժանանան, շատ հայեր կկարողանան գալ Հայաստան»,- ասաց նա՝ շնորհակալություն հայտնելով հայրենիքը ճանաչելու հնարավորության համար:

Սիրիահայ աղջկա խոսքին ի պատասխան Հրանուշ Հակոբյանը նկատեց, թե առաջիկայում մեծ թվով երեխաներ են գալու Հայաստան:

«Արի տուն» ծրագրի մասնակիցները 10 օր կանցկացնեն Հայաստանում։ Նրանք կապրեն հյուրընկալ ընտանիքներում, կայցելեն պատմամշակութային հուշարձաններ, հանդիպումներ կունենան պետական, արվեստի ու մշակութային գործիչների հետ, կմասնակցեն համերգների և այլ միջոցառումների:

Վերջին 4 օրը նրանք կանցկացնեն Աղավնաձորում, որտեղ նրանց համար կկազմակերպվի ճամբարային ծրագիր: