«Ալեքս ընդ հոլդինգ» ՍՊԸ-ն նվիրատվության դիմաց ոչ մի կառուցապատում չի ուզել. Հայկ Մարության

«Ալեքս ընդ հոլդինգ» ՍՊԸ-ն նվիրատվության դիմաց ոչ մի կառուցապատում չի ուզել։ Այս մասին այսօր Հանրային Հեռուստաընկերության եթերում «Հանրային քննարկում»  հաղորդաշարում ասաց Երևանի քաղաքապետ Հայկ Մարությանը։

Այն դիտարկմանը, թե արդյոք ինքը տեղյակ չէ, որ «Ալեքս ըսդ հոլդինգ»-ը Սամվել Ալեքանյանինն է, քաղաքապետը պատասխանեց.

«20-ից 3-ը նվիրել է «Ալեքս ընդ հոլդինգ» ՍՊԸ-ն, որի տնօրենն այլ անուն ազգանունով ինչ-որ մարդ է, չեմ հիշում, ճիշտն ասած։ Բաժնետերն ինչ-որ մարդ է, որն էլի Սամվել Ալեքսանյանը չէ։ Ես, որպես քաղաքապետ, իրավունք չունեմ ասելու, որ դա Ալեքսանյանի նվերն է, կամ դա իրենն է»:

Մարությանը նշեց, որ նա իրավունք ունի միայն ասելու, թե որ ընկերությունն է նվիրել՝ մնացած ենթադրությունները թողնելով կռահողներին: Ըստ նրա՝ այստեղ ոչ մի խնդիր չկա և նրանք հատուկ են նշել՝ ասելով, որ եթե Սամվել Ալեքսանյանը ցանկանում է նվեր տալ քաղաքին, ապա նրանք միշտ պատրաստ են ընդունելու։

Հայկ Մարությանը ցույց տվեց նաև մի փաստաթուղթ, ըստ որի՝ քաղաքացի Շողերինա Մկրտչյանին տրված շինթույլտվության համար տուգանք է դրվել։ «Այդ ի՞նչ փոխկապակցվածություն է. եթե մարդը նվիրում է, մենք դրա դիմաց տուգանո՞ւմ ենք»,- ասաց նա և նշեց, որ նվիրատվություն կատարածներից կան, ովքեր կառուցապատման ժամանակ տուգանք են ստացել քաղաքապետարանի կողմից։

Հիշեցնենք, որ ավելի վաղ «Լույս» խմբակցության ղեկավար Դավիթ Խաժակյանը հայտնել էր, որ Օհանով 15/1 հասցեում շինթույլտվության համար դիմում էր ներկայացրել գործարար Սամվել Ալեքյանյանի կին Շողերինա Մկրտչյանը։

Մանրամասները՝ տեսանյութում