«Նիկոլ, ուշքի արի՛». «Սասնա Ծռեր»-ի անդամները պահանջում են ազատ արձակել Արթուր Մովսիսյանին

Այսօր՝  դեկտեմբերի 13-ին, Ժիրայր Սեֆիլյանի գործով անցնող Արթուր Մովսիսյանը կրկին կալանավորեց: Նրա բողոքը Վճռաբեկ դատարանը վարույթ չի ընդունել, ինչի հետևանքով՝  նրա նկատմամբ կայացված դատավճիռը մտել է ուժի մեջ: Ըստ «Սասնա Ծռեր»-ի տարածած հայտարարության՝ Արթուր Մովսիսյանը պետք է բանտում անցկացնի ևս 3 ամիս 14 օր:

Հիշեցնենք, որ 2017 թվականին Արթուր Մովսիսյանը դատապարտվել էր երեք տարվա ազատազրկման:

Ըստ մեղադրական եզրակացության՝ ռազմական նշանակության շենք-շինություններ զավթելու նպատակով Արթուր Մովսիսյանն իր բնակարանում թաքցրել է հրազեն ու ռազմամթերք՝ այն փոխանցելով ժիրայր Սեֆիլյանի կողմից ստեղծված զինված խմբի մյուս անդամներին: Ինքը՝ Մովսիսյանը, պնդում է, որ Սեֆիլյանին չի ճանաչում: Ավելին՝ այդ օրերին ինքը Ռուսաստանի Դաշնությունում է գտնվել, որտեղ էլ կալանավորվել է ու միայն 6 ամիս հետո է տեղափոխվել Երևան։

2018 թվականի օգոստոսի 1-ին «Ժիրայր Սեֆիլյանի եւ մյուսների» գործով 3 տարի ազատազրկման դատապարտված Արթուր Մովսիսյանն ազատ արձակվեց. Վճռաբեկ դատարանը բավարարեց պաշտպան Արայիկ Պապիկյանի միջնորդությունը եւ փոխեց Մովսիսյանի խափանման միջոց կալանքը՝ կիրառելով ստորագրություն չհեռանալու մասին այլընտրանքային խափանման միջոցը։ Բացի վերոնշյալից, դատարանը որոշեց քրեական գործը հետ ուղարկել Վերաքննիչ դատարան՝ նոր քննության։

Կալանավորման վերաբերյալ «Սասնա Ծռեր» համահայկական շարժումը ֆեյսբուքյան էջում հայտարարություն էր տարածել՝ նշելով, որ «Սերժ Սարգսյանը վերադարձել է թավշե դիմակով»:

«Սասնա Ծռեր»-ի անդամները սոցցանցերում իրենց աջակցությունն են հայտնում Արթուր Մովսիսյանին, նաև կատարվածի մեջ մեղադրում են ՀՀ վարչապետ Նիկոլ Փաշինյանին:

Փաստաբան Արայիկ Պապիկյանն իր էջում հայտնել է, որ շուտով Մովսիսյանն ազատ կարձակվի, ապա հավելել՝ «Նիկոլին ասեք, որ Արթուրը բանտից չի վախենում։ Սերժի պատվերով կարված գործը ամբողջանում է քայլողների օրոք»:

Տեսանյութը՝ Ազատության (2017 թվական, օգոստոսի 7)