Միլիոնատերը մոտ 40 հազար դոլար կվճարի նրան, ով կլուսանկարի իրեն ճամփորդությունների ժամանակ

Ավստրալացի միլիոնատեր Մեթյու Լեպրեն փնտրում է լուսանկարիչ, ով կլուսանկարի իրեն ճամփորդությունների ժամանակ:

Ecom Warrior Academy ընկերության 27-ամյա հիմնադիրը մշտապես գործուղումների մեջ է և ելույթներ է ունենում ԱՄՆ-ում, Չինաստանում, Ճապոնիայում և այլ երկրներում:

Բացի դա, տղամարդն իր օգնականների հետ միշտ հինգ աստղանի հյուրանոցներում է կանգ առնում, գրում է The Sun-ը:

Մեթյուն խոստանում է 40 հազար դոլար վճարել իր լուսանկարչին: Երիտասարդ միլիոնատիրոջ խոսքով՝ ժամանակին իրեն լուսանկարում էր իր լավագույն ընկերը, սակայն նա հիմա աշխատանքային այլ  պարտականություններ ունի:

Նա նշում է, որ աշխատանքի համար անհրաժեշտ է միայն գործող անձնագիր և լավ ճաշակ:

Մեթյուն խոստանում է, որ աշխատանքի անցած լուսանկարչի բոլոր ճամփորդություններն ու ծախսերը կվճարվեն հենց իր կողմից: