ԱԺ տնտեսական հարցերի հանձնաժողովի 2019-ին ընդունած նախագծերից 3-ը եղել են ընդդիմությանը, 2-ը`համատեղ

ՀՀ ազգային ժողովի տնտեսական հարցերի մշտական հանձնաժողովը 2019-ին ամբողջությամբ ընդունել է ընդհանուր 67 օրենքի նախագիծ, որոնցից 4-ը եղել են իշխանական «Իմ քայլը» խմբակցության պատգամավորներինը, 3-ը` ընդդիմադիր՝ «Լուսավոր Հայաստան» խմբակցությանը, 2-ը`  «Իմ քայլը» և «Բարգավաճ Հայաստան» խմբակցությունների համատեղ: Այս մասին ԱԺ դեկտեմբերի 19-ի արտահերթ նիստում հայտնեց հանձնաժողովի նախագահ Բաբկեն Թունյանը՝ անդրադառնալով հաճախ հնչող հարցերին, թե ընդդիմության ներկայացրած նախագծերը մերժվում են:

«Կարծում եմ, որ արդյունավետ տարի է եղել: Տնտեսական հարցերի մշտական հանձնաժողովում բավականին ինտենսիվ աշխատել ենք, քննարկել ենք ընդհանուր առմամբ 86 նախագիծ, որոնցից ամբողջությամբ ընդունել ենք 67-ը, առաջին ընթերցմամբ` 8-ը, մերժել ենք 11 նախագիծ»,-ասաց Թունյանը: