Քաղաքական ուժեր կան, որ խեղդվելու պրոցեսի մեջ են ու հիմա փրփուրից էլ են ձեռք գցում․ Փաշինյան (տեսանյութ)

Այսօրվա դրությամբ 126 դպրոցի վերաբերյալ կան քրեական գործեր, որոնց տնօրենները իրենց բարեկամներին, հարազատներին, բաջանաղներին բերել են դպրոցներում ձեւակերպել են այս կամ այն հաստիք ու պետությունից աշխատավարձ են ստացել առանց գործի գալու: Այս մասին այսօր՝ դեկտեմբերի 19-ին, կառավարության նիստում հայտարարեց ՀՀ վարչապետ Նիկոլ Փաշինյանը:

«Հետո էլ պիտի ասեն, թե ինչու է ուսուցիչների աշխատավարձը բարձրանում ոչ թե 10 տոկոսով, այլ 20: Շատ պարզ պատճառով, որովհետեւ մենք հիմա բարձրացնում ենք ոչ միայն ուսուցիչների աշխատավարձը, այլեւ գողացողների աշխատավարձը: Եթե 126 դպրոցներում նման գործեր կան, նշանակում է՝ սա համատարած է:

Ընդհանրապես, պետբյուջեի հետ կապված էսօր 250 քրեական գործ կա, որտեղ հասցեագրված գոյություն չունեցող հինգ հարյուրից ավելի մարդ գրանցվել ու աշխատավարձ է ստացել, այս երեւույթները մինչեւ արմատախիլ չանենք, արդյունք չենք ունենա», - ասաց Փաշինյանը:

«Քաղաքական ուժեր կան, որ խեղդվելու պրոցեսի մեջ են ու հիմա փրփուրից էլ են ձեռք գցում: Շատ լավ, եթե իրենց պետք է ձեռք մեկնել, որ իրանք չխեղդվեն, ուրեմն իրենք իրենց պետք է այնպես պահեն հանրության հետ, որ դա ավելի չահագնանա, սա շատ կարեւոր արձանագրում է», - ընդգծեց Նիկոլ Փաշինյանը:

Նա նկատեց, թե ավելի ավագ սերնդի ներկայացուցիչներն ասում են, թե կարեւորը մեջքն է, ծանոթն է. «Ասում են՝ պտի կարանաս խաբես, ֆռցնես, շուստրիություն անես, շողոքորթես, էդ ա կյանքի ճանապարհը: Ոչ, սիրելի երեխաներ, դա կյանքի ճանապարհ էր, որը ձախողվեց 2018 թվականին, որը ոչնչացավ: Հիմա կյանքի ճանապարհը կրթությունն է, օրինապահությունը, մենք էս ճանապարհը ձեզ համար կառուցելու ենք ու ասֆլատ ենք անելու երթեւեկության պատշաճ կանոններով», - նշեց վարչապետը: