Արամ Ա-ն՝ միջին Արևելքի եկեղեցիների խորհրդի նախագահ

Կիպրոսում գումարված Միջին Արևելքի եկեղեցիների խորհրդի համաժողովում Մեծի Տանն Կիլիկիո Արամ Ա կաթողիկոսը վերընտրվել է խորհրդի նախագահ։ Համաժողովին, որ տեղի է ունենում չորս տարին մեկ անգամ, մասնակցում են Միջին Արևելքի բոլոր եկեղեցիների պատվիրակությունները։

Համաժողովի առաջին օրն Արամ Ա-ն ներկայացրել է զեկույց՝ խորհրդի անցած չորս տարվա գործունեության, դիմագրաված մարտահրավերների մասին՝ հատկապես անդրադառնալով տնտեսական և վարչա-կազմակերպչական հարցերին, ինչպես նաև Միջին Արևելքում տիրող աշխարհաքաղաքական վիճակին և խորհրդի գործունեության վրա այդ իրավիճակի բացասական անդրադարձին։ Կաթողիկոսը շեշտել է, որ խորհուրդը շարունակել է իր առաքելությունը և կոչված է դառնալու Միջին Արևելքի եկեղեցիների ձայնը։

Նրանից հետո ելույթ ունեցած բողոքական և կաթոլիկ եկեղեցիների ներկայացուցիչներն ընդգծել են խորհրդի կարևորությունը՝ որպես տարածաշրջանի եկեղեցիները համախմբող կառույցի։ Նույն օրը տեղի է ունեցել նոր գործադիր վարչության ընտրությունը, որի ժամանակ էլ Արամ Ա-ն վերընտրվել է խորհրդի նախագահ։