6-7 հոգով են ծեծել Արա Մխիթարյանին, այդ թվում` մարզպետը. պահեստազորի փոխգնդապետ

«Ճիվաղներ, հեռո՛ւ մնացեք Հայոց բանակից ու սպաներից: Սա արդեն վերջն էր: Ականջներիդ օղ արեք` հայոց պետականության հիմնասյուները հայոց բանակի սպաներն են, չի՛ կարելի այդ մարդկանց ճակատագրերի ու կյանքերի հետ խաղալ»,- այս մասին  լրագրողների հետ զրույցում դիմելով բոլորին ասաց Պահեստազորի փոխգնդապետ Կարեն Հակոբյանը, ով այս պահին Եղեգնաձորում դաժան ծեծի ենթարկված և 6 ամիս կոմայի մեջ գտնվող փոխգնդապետ Արա Մխիթարյանի հարազատների հետ հոսպիտալի դիմաց է:

Ինչ վերաբերում է դատարանի որոշմանը, ապա Հակոբյանը հորդորեց վերականգնել արդարադատությունը և արդար դատաքննություն իրականացնել. «Արդարադատությունը չի գալիս Սահմանադրական դատարանից, այլ անհատական դատավորներից, քննչական մարմիններից, դատախազությունից ու մնացածից: Վերականգնե՛ք արդարությունը: 4 սպա վկայություն է տալիս, որ 6-7 հոգով են ծեծել Մխիթարյանին, այդ թվում` մարզպետը, դրանից հետո այնպես են սարքում, թե իբր մարզպետը չի եղել: Մարզպետն էլ է եղել, 6-7 հոգի էլ մարդ է եղել: Լինելով ղեկավար մարմնի կամ մարզպետարանի աշխատող` զանգեիք ոստիկանություն, ասեիք ձեր սպան խմած է, եկեք տեր եղեք, բայց չէ՝ դուք գողական եք գնում, ղեկավար մարմիններում եք աշխատում»,- իր վրդովմունքը հայտնեց փոխգնդապետը:

Ներկաների խոսքով՝ դատապարտյալներին հերթով ուզում են ազատ արձակել, որ գործը խմբակայինով չլինի և պատասխան տա միայն մեկը: 

Նշենք, որ ՔԿ-ն հայտնել էր, որ Վայոց ձորի նախկին մարզպետ Տրդատ Սարգսյանը 2019թ. սեպտեմբերի 17-ին տեղի ունեցած վիճաբանությանն ականատես չի եղել, դեպքի վայրում չի գտնվել: Սակայն դեպքին ականատես 4 սպաներն ասել են, որ նախկին մարզպետը եղել է դեպքի վայրում և հետևել է միջադեպին` չկանխելով այն:

Այս գործով մեղադրանք է առաջադրվել Վայոց Ձորի նախկին մարզպետի օգնական Հարություն Գրիգորյանին։ Մեղադրյալի կարգավիճակում են Գրիգորյանի եղբայրը՝ Զավեն Գրիգորյանը։ Միջադեպից մեկ շաբաթ անց Տրդատ Սարգսյանը հրաժարական տվեց Վայոց ձորի մարզպետի պաշտոնից։

Երեկ՝ մարտի 6-ին, Վերաքննիչ քրեական դատարանի որոշմամբ Զավեն Գրիգորյանը գրավի դիմաց ազատ է արձակվել, ինչն առաջացրել է Մխիթարյանի հարազատների վրդովմունքը: