ԵՊՀ-ում մթնոլորտը խնդրահարույց է. ինչ ակնկալել ռեկտորի սպասվող ընտրությունից

ԵՊՀ արևելագիտության ֆակուլտետը մայր բուհի ռեկտորի ընտրություններում առաջադրել է ֆակուլտետի դեկան Ռուբեն Մելքոնյանի թեկնածությունը: Սպասվող ընտրություններից, ծրագրից և ԵՊՀ-ում տիրող մթնոլորտի մասին ԼՈՒՐԵՐ.com-ի թղթակիցը զրուցեց Մելքոնյանի հետ: Վերջինս ակնկալում է, որ կլինի համալսարանական և ակադեմիական միջավայրին հարիր ընտրություն, որի ընթացքում ծրագրեր կներկայացվեն, կլինի համապատասխան քննարկում՝ միտված  ավելի լավ համալսարան ստեղծելուն:

«Համալսարանը շատ կարևոր գործառույթներ ունի և դա միայն կրթական ծառայություններ մատուցելը, գիտական աշխատանքներ կատարելը չէ, այլ նաև՝ հասարակական շերտի ձևավորմանը նպաստելը, այն շերտը, որը ներկայացնում է համալսարանական մտավորականությունը, այսինքն՝ պետք է ստեղծվի այնպիսի միջավար, որտեղից դուրս կգան մտավորականներ, ովքեր ունեն իրենց աշխարհայացքը, որը ձևավորվում է ուսանող տարիներին»,-նշեց նա:

Մելքոնյանն ընդգծեց, որ ԵՊՀ ռեկտորն, առնվազն, պետք է ապահովի այնպիսի միջավայր, որտեղ կմատուցվեն  ժամանակակից պահանջներին հարիր կրթություն և որը, միևնույն ժամանակ, հենված կլինի ազգային արժեքների, լավ քաղաքացի ձևավորելու վրա. «Բացի այդ, պետք է քայլեր անել, որպեսզի ստեղծվի ուսանողների համար լավ միջավայր: Կարծում եմ՝ խիստ կարևոր է աշխատանքային ճիշտ բարոյահոգեբանական մթնոլորտի ձևավորումը, որը կբացառի ազատ խոսքի, մտքի ճնշումը»:

Դեկանը դժվարացավ պատասխանել, թե ինչպիսի՞ն են ռեկտոր դառնալու իր շանսերը: Նա նշեց, որ դա որոշելու է ԵՊՀ հոգաբարձուների խորհուրդը, թեպետ վստահ է, որ աշխատանքային փորձից ելնելով՝ կարող է ներկայացնել հետագա ռամավարության իրատեսական ծրագիր:

Հարցին, թե արդյո՞ք ԵՊՀ-ում տիրող անառողջ ու լարված մթնոլորտը, որը ձևավորվել է վերջին տարիներին, դեռ շարունակվում է, Մելքոնյանը պատասխանեց. «Համալասարանում մթնոլորտը բավականին խնդրահարույց է: Կան խնդիրներ՝ տարբեր ոլորտների,  տարբեր ստորաբաժանումների և ռեկտորի միջև, դատական քաշքշուկներ, ինչպես նաև ընդհանուր աշխատանքային մթնոլորտի որոշակի աղճատված պատկեր: Այդ խնդիրներից մի քանիսը նույնիսկ  կարող ենք դիտարկել որպես ճգնաժամային: Ես կարծում եմ, որ սա ազդում է նաև համալսարանի ընդհանուր աշխատանքային միջավայրի և գիտակրթական գործընթացների վրա: Մթնոլորտի կարգավորման հարցը պետք է շատ արագ փորձել լուծել»:

Հիշեցնենք` ԵՊՀ ռեկտորի ընտրությունը տեղի կունենա մարտի 23-ին: Առաջադրվել է 5 թեկնածու՝ ԵՊՀ արևելագիտության ֆակուլտետի դեկան Ռուբեն Մելքոնյանը, Ինֆորմատիկայի ու կիրառական ֆակուլտետի դեկան Վահրամ Դումանյանը, Իրավագիտության ֆակուլտետի Քաղաքացիական դատավարության ամբիոն վարիչ Վահե Հովհաննիսյանը, ՀՀ ԳԱԱ ակադեմիկոս, Ֆարմացիայի ինստիտուտի տնօրեն, ԵՊՀ Ֆարմքիմիայի և ֆարմակագնոզիայի ամբիոնի դասախոս Աշոտ Սաղյանը և Արցախի համալասարանի նախկին դասախոս, ֆիզիկամաթեմատիկական գիտությունների դոկտոր, պրոֆեսոր Պավել Գևորգյանը։