Իմ տղայի գործն էլ մի կողմ դրած, ես ԱՅՈ-ին եմ կողմ. սևազգեստ մայրը՝ հանրաքվեի մասին

«Փաշինյանը հարցին խելացի և մարդկային մոտեցում է տվել»,- ասում է բանակում խաղաղ պայմաններում զոհված զինծառայողի մայր Իրինա Ղազարյանը: Նա և բողոքի ակցիաներ իրականացնող մյուս ծնողները մարտի 8-ին հանդիպեցին վարչապետ Նիկոլ Փաշինյանի հետ և ընդհանուր հայտարարի եկան քննվող գործերի հետագա ընթացքի վերաբերյալ:

«Ես վարչապետին վստահում եմ, բայց չեմ վստահում նախկինից մնացած Քննչական Կոմիտեին, Դատախազությանը, պաշտոնյաներին, ովքեր  տարիներ շարունակ անարդար քննություն են իրականացրել, դրանք էսօր ոնց կփոխվեն, ոնց արդար քննություն կիրականացնեն: Այսօր իմ փաստաբանը Արայիկ Պապիկյանն է, ես իրեն լիարժեք վստահում եմ, ինքը արդար քննություն կիրականացնի, բայց, թե իրեն արդյոք լիարժեք նյութեր կտրամադրի Քննչական կոմիտեն ու մյուսները, դա հարց է, որն ինձ տանջում է, և ես էլի ու էլի եմ այդ մասին ասելու վարչապետին»:

Ղազարյանն ասում է՝ իրենց կռիվը միայն իրենց որդիների գործերը չեն, վերջին 13 մահացության դեպքից գոնե մեկը, եթե բացահայտվի, կմտածեն՝ այո, գործ են անում:

«Փաշինյանին հավատում եմ, ուզում եմ մինչև վերջ հավատալ, հուսով եմ, որ, եթե ամիսներ հետո հարցնեք, հիասթափված չեմ լինի: Բայց, ասեմ նաև, որ, եթե գործընթացի ժամանակ նկատեմ, որ գոնե մեկն ու մեկիս գործով առաջընթաց չկա, ամեն ինչ կթողնեմ ու կսկսեմ էլի բողոքել այնքան, մինչև կհասնեմ արդարության»: 

Մինչ ապրիլի 10-ը մայրերը բողոքի ակցիա չեն իրականացնի, ինչպես պայմանավորվեցին վարչապետի հետ հանդիպման ժամանակ: Հաջորդ հանդիպման օրը ապրիլի 10-ն է, մինչ այդ՝ հնարավոր է ևս մեկ փակ հանդիպում լինի ծնողների և վարչապետի միջև:

Անդրադառնալով Ապրիլի 5-ին անցկացվելիք հանրաքվեին՝ Ղազարյանն ասաց.

«Ինչ էլ լիներ, այս ԱՅՈ-ն, այո, պիտի լինի: Այ այդ նախկինից մնացածներն են մեր արյունը ծծել, դրանց պատճառով է, որ այս հանցագործությունների շղթան չի բացվում: Միանշանակ, անկախ ամեն ինչից, իմ տղայի գործն էլ մի կողմ դրած, ես կողմ եմ ԱՅՈ-ին, և ԱՅՈ-ն հաղթելու ա, որովհետև շատերն են այդ կարծիքին»: