Ով «խնչի», ով «ուտի». բախումն անկասելի է

«Իմ քայլը» խմբակցության պատգամավոր Սոֆյա Հովսեփյանն օրերս անդրադարձել էր Գյումրիում ծեծի ենթարկված 42-ամյա կնոջ ու նրա 13-ամյա դստեր դեպքին։ «ՀԱԿ, ՖԵՄ խմբերը և ԼԳԲՏ համայնքը կրկին ակտիվացել են, քանի որ հարց եմ տվել՝ «արդյոք, բացի այն, որ մայրը զոհ էր, ոչ մի մեղք չունի կատարվածի համար, քանի որ իր երեխային ծեծել են պարբերաբար, ինչպես վկայում են հարևանները և նա լռել է»։ Կարծում եմ՝ հասկանում եք ինչ ասել է «մայր»»,- գրել էր Հովսեփյանը։

Պատգամավորի գրառումից հետո համացանցում սկսեցին գրառումներ կատարել, որ Հովսեփյանը պետք է վայր դնի մանդատը։ Դրանցից մեկի տակ Երևանի քաղաքապետի մամուլի խոսնակ Հակոբ Կարապետյանը թողել էր՝ «ուտի» մեկնաբանությունը, ինչը սոցցանցում բուռն քննադատության էր արժանացել, նշում էին, որ նա պետք է ներողություն խնդրի այդ արտահայտության համար և նկատողություն ստանա Երևանի քաղաքապետ Հայկ Մարությանից։ Սակայն նկատենք՝ խոսնակը մինչև հիմա որևէ ձևով չի արձագանքել։ 

Ի դեպ՝ սա առաջին դեպքը չէ, երբ Կարապետյանն իրեն նման արտահայտություն է թույլ տալիս․ հիշենք, երբ նախորդ տարի Հայկ Մարությանի առաջարկը բազմաթիվ քաղաքացիների, վարորդների շրջանում մտահոգություն էր առաջացրել, քաղաքապետի մամուլի խոսնակն այն ժամանակ ևս բավական կոշտ էր արձագանքել՝ գրելով «խնչած ունեմ»։

Հատկանշական է նաև, որ իմքայլականների կողմից իրենց թիմակից Սոֆյա Հովսեփյանին թիրախավորելը ևս միակ դեպքը չէ: Հունվարի սկզբին «Իմ քայլը» խմբակցության պատգամավոր Կարեն Սարուխանյանը Հովսեփյանին վիրավորել էր՝ ասելով. «Ամուսնացիր՝ կանցնի», ինչը ևս քննարկման առարկա էր դարձել: