Սպաները սուտ ցուցմունք են տվել. մանրամասներ՝ փոխգնդապետին ծեծի ենթարկելու գործով

Վայոց ձորում ՀՀ ՊՆ փոխգնդապետ Արա Մխիթարյանին նախորդ տարվա սեպտեմբերին ծեծի ենթարկելու գործով կալանավորված Զավեն Գրիգորյանը գրավի դիմաց օրեր առաջ ազատ արձակվեց:

«Մենք ակնկալում էինք, որ Զավեն Գրիգորյանը ազատ կարձակվի առանց գրավի, որովհետև չկար ոչ մի հիմնավոր կասկած առ այն, որ նա կատարել է իրեն վերագրվող հանցանքը: Գործը բացվելուց մեկ, երկու ամիս անց արդեն կային բավարար ապացույցներ, որոնցով ուղղակիորեն հերքվում էր, որ Զավեն Գրիգորյանը կատարել է այդ հանցանքը»,-ասում է Զավեն Գրիգորյանի պաշտպանը՝ լրագրողների հետ հանդիպման ընթացքում:

Պաշտպանը մանրամասներ ներկայացրեց դեպքի վերաբերյալ:

«Տպավորություն է ստեղծվել, թե 7-8 սադիստ անհայրենասերներ դաժանորեն ծեծի են ենթարկել հայոց սպային: Իրականում վեճը տեղի է ունեցել բացառապես կենցաղային հողի վրա: Հարություն Գրիգորյանը՝ Զավեն Գրիգորյանի եղբայրը, ով այժմ գտնվում է կալանքի տակ, դեպքի օրը ժամը 24;00-ի սահմաններում իր մեքենայով եկել է տուն, որտեղ որտեղ կնոջ հետ է ապրում: Շենքի բակում ներկա են եղել 4 սպաներ, որոնք 2 ռեստորաններում մասնակցել են խնջույքների, օգտագործել են ոգելից խմիչք, նրանցից որոշները եղել են ծայրահեղ հարբած վիճակում: Կոնֆլիկտ է ծագել Հարություն Գրիգորյանի և այդ սպաների միջև»:

Թե ինչպես է կոնֆլիկտը ծագել և ում դրդմամբ, պաշտպանը չմանրամասնեց, այդ տեղեկությունը հայտնի կդառնա նախաքննության ավարտից հետո:

«Սովորական տրամաբանող քաղաքացու մոտ կարող է արդեն լինել այն կանխավարկածը, թե ինչպես է վեճ սկսվել գիշերն ուշ տուն վերադարձող  հոգնած մարդու և չորս հարբած սպաների միջև: Կոնֆլիկտի արդյունքում Հարություն Գրիգորյանը փախչում է իրենց շքամուտք, հասնում է իրենց հարկ: Այս ամենը հաստատված է գործով:  Սպաները Հարություն Գրիգորյանին հետապնդում են մինչև իրենց հարկ, այստեղ էլ քաշքշոցը շարունակվում է: Սրանից հետո Հարություն Գրիգորյանը զանգահարում է իր ընկերներին ու եղբորը՝ Զավեն Գրիգորյանին: Ի դեպ, եղբորը զանգահարում է ամենավերջինը: Շքամուտքի մոտ արդեն տեղի է ունենում դեպքը, որի մանրամասները ևս կիմանանք նախաքննությունից հետո»:

Պաշտպանը պնդում է՝ կան բոլոր ապացույցները, որ Զավեն Գրիգորյանը դեպքի վայրում չի եղել:

«Դեպքը, երբ ավարտվում է, արդեն Արա Մխիթարյանը լինում է անգիտակից վիճակում, այդ ժամանակ Հարություն Գրիգորյանը զանգահարում է շտապ բժշկական օգնություն, սրանից մեկ րոպե առաջ, միայն, դեպքի վայր է հասած լինում Զավեն Գրիգորյանը, ում վերաբերյալ սպաները հետագայում սուտ ցուցմունք են տվել: Այդ ցուցմունքների պատճառով Զավեն Գրիգորյանը 5 ամիս անցկացրեց անազատության մեջ»:

Պաշտպանի պնդմամբ՝ պաշտպանական կողմն ամեն ինչ անելու է, որ սուտ մատնությամբ զբաղված սպաները պատժվեն:

Հիշեցնենք, որ 2019 թվականի սեպտեմբերի 18-ին՝ ժամը 00:00-ի սահմաններում, Վայոց ձորի Եղեգնաձոր քաղաքում աղմկահարույց միջադեպ էր տեղի ունեցել, որին մասնակցություն էր ունեցել Վայոց ձորի՝ արդեն նախկին մարզպետ Տրդատ Սարգսյանի օգնական Հարություն Գրիգորյանը (միջադեպից հետո մարզպետը հրաժարական էր տվել): Դեպքի առթիվ հարուցվել էր քրեական գործ՝ ՀՀ քրեական օրենսգրքի 112-րդ հոդվածի 1-ին մասի հատկանիշներով (դիտավորությամբ առողջությանը ծանր վնաս պատճառելը): Ենթադրյալ հանցագործություն կատարած անձանցից մեկին՝ Հարություն Գրիգորյանին, մեղադրանք էր առաջադրվել նույն հոդվածով՝ 112-րդ հոդվածի 1-ին մասով, իսկ նրա եղբորը՝ Զավեն Գրիգորյանին, 112-րդ հոդվածի 2-րդ մասի 6-րդ կետով (մի խումբ անձանց կամ կազմակերպված խմբի կողմից դիտավորությամբ առողջությանը ծանր վնաս պատճառելը): Տուժած ՀՀ ՊՆ փոխգնդապետ Արա Մխիթարյանը տեղափոխվել էր ՀՀ ՊՆ կենտրոնական կլինիկական հոսպիտալի վերակենդանացման բաժանմունք:

Նշենք նաեւ, որ գործով ականատես վկաներ զինծառայողներ Մարիամ Հունանյանը, Ժորա Բաղդասարյանը, Մխիթար Մելքոնյանը, Լևոն Հարությունյանն իրենց ցուցմունքներում նշել էին նախկին մարզպետ Տրդատ Սարգսյանի՝ դեպքի վայրում գտնվելու և անգործություն դրսևորելու հանգամանքի մասին, ինչը պնդել են նաեւ Սարգսյանի հետ առերեսման ժամանակ, սակայն Քննչական կոմիտեն պաշտոնապես հայտնել է, որ Սարգսյանը դեպքի վայրում չի եղել: