Նոր մարզիչը լավագույն ընտրությունը չէ. նա անցել է վաստակած հանգստի. կարծիք

Հայաստանի ֆուտբոլի ազգային հավաքականի գլխավոր մարզիչ է նշանակվել իսպանացի 64-ամյա հայտնի մասնագետ Խոակին Կապարոսը: ԼՈՒՐԵՐ.com-ի թղթակիցը զրուցեց  ֆուտբոլասեր, ՖԱՖ-ի համահիմնադիր Էդգար Պետրոսյանի հետ՝ պարզելու, թե ինչ կարծիք ունեն նորանշանակ մարզիչի մասին հայ ֆուտբոլասերները և ինչ են ակնկալում նրանից:

«Կարծում եմ՝ Հայաստանի բարձրագույն խմբի ակումբներին մարզող հայ և այլազգի մարզիչներ կան, ովքեր շատ ավելի լավ ընտրություն կլինեին մեզ համար, քան այս մարզիչը, որն արդեն ապրել է իր մարզչական կյանքը և անցել է վաստակած հանգստին»,-ասաց նա:

Պետրոսյանը համոզված է, որ ընտրությունը կարող էր կանգ առնել մեր երկրի բարձրագույն խմբի ակումբները մարզող կամ մարզած մարզիչների ցանկից, ավելի երիտասարդ, ավելի նպատակասլաց ու ժամանակի պահանջներին համապատասխան թեկնածուներից որևէ մեկի վրա: Եվ բնավ, կարևոր չէր լինի նրա ազգային պատկանելությունը:

«Նորանշանակ մարզիչը կարող է ունենալ նաև հաջողություններ։ Բայց դա իրականացնելու համար կարևոր են մի քանի գործոններ. նա մշտապես բնակվի և աշխատի Հայաստանում, ՀՀ ազգային հավաքականի հիմնական և երկրորդ կազմից ստեղծի ՀՀ ակումբային հավաքական, որը կազմավորված կլինի բարձրագույն և առաջին խմբում հանդես եկող հայ ֆուտբոլիստներից: Բացի այդ՝ լինի աշխատասեր և տիրապետի ժամանակի համապատասխան տեսական և գործնական միջոցներին, ինչպես նաև նրա ունեցած ֆուտբոլային պատկերացումները, գիտելիքները համապատասխանեն ներկայի պահանջներին»,-ընդգծեց նա: 

Պետրոսյանը նշեց, որ հավաքականի վերջին մի քանի հանդիպումները, այդ թվում և պարտությունները հավաքականի ներկայիս վիճակի չափանիշը չեն. «Հիմա ունենք նոր մարզիչ, նոր խաղերի ընթացքով և արդյունքներով պետք է դատենք, կապրենք՝ կտեսնենք»։

Հարցին, թե  որքա՞ն ժամանակ կպահանջվի, որպեսզի մեր հավաքականը ավելի որակյալ խաղ ցույց տա, նա պատասխանեց. «Ավելի որակյալ ասվածը շատ հարաբերական հասկացողություն է: Եթե մեր նպատակը, դեռևս, մնում է ԵԱ կամ ԱԱ որակավորման փուլերից կամ Ազգերի լիգայի մրցաշարից ԵԱ կամ ԱԱ եզրափակիչ փուլի ուղեգիր ձեռք բերել, ուրեմն երկարատև տարիների աշխատանք ունենք կատարելու, եթե խոսում ենք փոքր, ժամանակավոր հաջողությունների մասին, այդ թվում՝ առանձին վերցրած խաղերում հաղթանակների տեսքով, դրանք միշտ էլ եղել են և կլինեն: Մենք տիրապետում ենք բարձր ֆուտբոլային պոտենցիալի, որին չենք կարողանում ճիշտ զարգացման ուղի տալ»։

Նշեք, որ նորանշանակ մարզիչի պայմանագիրը ուժի մեջ է մինչև 2021թ. նոյեմբերի 30-ը: Հավաքականի նախորդ մարզիչ Աբրահամ  Խաշմանյանը հրաժարական էր ներկայացրել փետրվարի 12–ին: