Մենք պետք է ունենանք իրար հետ չհամաձայնվելու կուլտուրա. Նիկոլ Փաշինյան

Ես վերջերս մի գրառում կարդացի, որի մեջ հայհոյախառը կամ դրան մոտիկ, վիրավորական բառապաշար կար իմ մասին: Սակայն այդ գրառման բովանդակությունն ինձ մտահոգեց: Տեղ գյուղում հայտարարեց ՀՀ վարչապետ Նիկոլ Փաշինյանը:

«Խոսքը նրա մասին էր, որ քաղաքական բանավեճերից հետո պատահում է, որ փողոցում մեր ընդդիմադիրներին կանգնեցնում են և որոշակի վերապահումներ ներկայացնում: Ընդհուպ տհաճ խոսակցություն է տեղի ունենում: Դա ինձ մտահոգում է: Դա հաջորդ խնդիրն է, որը մենք այս հանրաքվեի արդյունքներով պետք է լուծենք:

Քաղաքականությունն այնպիսի բան է, որ բանավեճը, խոսակցությունը սրվում է: Սակայն դրա ավարտվելուց հետո մենք պետք է վերադառնանք մեր նախնական վիճակին, քաղաքական և քաղաքացիական համակեցության վիճակին: Վիրավորանքը տեղ չպետք է ունենա մեր փոխհարաբերությունների մեջ»,-ասաց Փաշինյանը:

Վարչապետը նշեց, որ իրենք էլ երբեմն երևի ավելի էմոցիոնալ են դառնում, քան՝ պետք է. «Ես դա վատ բան չեմ համարում: Այո մենք պետք է նաև էմոցիաներով շփվենք: Սակայն դրանք չպետք է դառնան փոխադարձ ատելություն, մարդկանց յուրայինների և օտարների բաժանելու գործընթաց, դրանք չպետք է վատթարացնեն մթնոլորտը:

Հայաստանում առողջ մթնոլորտ պետք է լինի: Մենք պետք է որդեգրենք բանավեճի կուլտուրան: Բանավեճից հետո մենք պետք է ժպտանք իրար, այն չպետք է տարածվի մեր կյանքի վրա: Մենք՝ բոլորս, ՀՀ հպարտ քաղաքացիներ ենք: Մեզ միավորում է քաղաքացիությունը, հայրենիքը, որը մենք չենք կարող իրար մեջ բաժանել»:

«Բանավեճից հետո ինձ մոտ անձնական վերաբերմունք չի մնում: Ես հասկանում եմ, որ քաղաքական գործիչներից ոմանց ելությները կարող են ձեզ դուր գալ կամ չգալ, սակայն էմոցիաները չպետք է տեղափոխել բանավեճից դուրս:

Մենք պետք է ունենանք իրար հետ չհամաձայնվելու կուլտուրա:

Ես մեր կողմնակիցներին կոչ եմ անում անգամ ատելությանն ատելությամբ, զզվանքին զզվանքով չպատասխանել: Մենք սիրո ու համերաշխության Հայաստանում ենք ապրում: Այո, մեզ կարող են ատել, բայց դրան ատելությամբ չպետք է պատասխանենք: Պետք է պատասխանենք սիրով: Ես ուզում եմ, որ այս հանրաքվեի արդյունքում այս լարվածությունը մեր հանրապետությունից թոթափվի: Ես հույս ունեմ, որ այս 1,5 տարվա գուցե նաև մեր մեղքով կուտակված նեգատիվը կպարպվի, կգնա: Մենք թեման ավարտած կհամարենք»,-ասաց Փաշինյանը: