85 տարեկան հասակում մահացել է Թեմուր Մարգարյանը

ՀՀ քաղաքաշինության կոմիտեն հայտնում է, որ 85 տարեկան հասակում մահացել է Թեմուր Գևորգի Մարգարյանը:

«Խորապես վշտացած ենք, չափազանց մեծ կորուստ բոլորիս համար…

Տեխնիկական գիտությունների դոկտոր, պրոֆեսոր, պետական ամենաբարձր պարգևների արժանացած Թեմուր Մարգարյանը նշանակալի ավանդ է ունեցել Հայաստանի քաղաքաշինության բնագավառի զարգացման, գիտության գործում: Հայաստանի ճարտարագիտական և տեխնոլոգիական ակադեմիաների ակադեմիկոս, տեխնիկական գիտությունների դոկտոր Թեմուր Մարգարյանը եղել է ՀՀ քաղաքաշինության նախարարության գիտատեխնիկական վարչության պետ: Նրան հիշում ենք, որպես Մեծ մասնագետի, ով չափազանց համեստ և առաքինի Մարդ էր, բացառիկ արժեքներով օժտված անհատականություն:

Թեմուր Մարգարյանը մեծ ներդրում է ունեցել շինարարական կոնստրուկցիաների, սեյսմակայուն շինարարության, շենքերի և կառուցվածքների տեխնիկական վիճակի հետազննման, վերականգնման և ուժեղացման գիտական ձեռքբերումների ոլորտում:

Նա կրթել է սերունդներ, անվանի մասնագետներ, նախաձեռնել և իրագործել գիտահետազոտական բազմաթիվ աշխատանքներ և ծրագրեր: 110-ից ավելի հրատարակված աշխատանքների, 6 գյուտերի հեղինակ է: Թեմուր Մարգարյանի նվիրյալ աշխատանքի շնորհիվ ստեղծվել է շինարարության ոլորտի նորմատիվային փաստաթղթերի համակարգ:

Մարգարյանն անձամբ է վերահսկել Որոտան-Արփայի շինարարության ավարտը: Հեղինակավոր մասնագետն իր ողջ կյանքը նվիրել է Հայաստանում նշված ոլորտների զարգացմանը, երբեք չսպասելով մեծարանքի:

ՀՀ քաղաքաշինության կոմիտեն խորին ցավակցություն է հայտնում Թեմուր Մարգարյանի հարազատներին, մտերիմներին, մասնագիտական հանրությանը:
Մեծանուն պրոֆեսորի անունը միշտ վառ կմնա մեր հուշերում…»,- ասված է քաղաքաշինության կոմիտեի ցավակցական ուղերձում: