Ամենախոշոր նվիրատվություններն՝ ուղղված կորոնավիրուսի կանխարգելմանն ու հաղթահարմանը

Հասարակություն 26 Մարտ, 2020 21:17

Կորոնավիրուսի կանխարգելման և հաղթահարմանն ուղղված գանձապետարանի հաշվին այս պահին կա շուրջ 660 մլն դրամ: Հայ մեծահարուստները՝ «Տաշիր» բարեգործական հիմնադրամի հիմնադիրներ Սամվել և Կարեն Կարապետյանները, «Գրանդ Հոլդինգ»-ի սեփականատերեր Կարեն և Միքայել Վարդանյանները, ՀՀ ԱԺ պատգամավոր և գործարար Գագիկ Ծառուկյանը, ՀՀԿ-ական նախկին պատգամավոր և գործարար Սամվել Ալեքսանյանը, ինչպես նաև Մայր Աթոռը և այլք, գումարներ են հանգանակել հիմնադրամին: Նրանցից ամենախոշորները ներկայացնում ենք ստորև:

Ըստ գումարի մեծության՝ նվիրատուների ցանկում առաջին հորիզոնականը կիսում են գործարարներ Սամվել և Կարեն Կարապետյաններն ու Կարեն և Միքայել Վարդանյանները: Մասնավորապես, «Տաշիր» բարեգործական հիմնադրամը՝ ի դեմս Սամվել և Կարեն Կարապետյանների, 100 մլն դրամ է հանգանակել գանձապետարանին, որից 50 մլն-ը փոխանցվել է «Նորք» ինֆեկցիոն կլինիկական հիվանդանոցին, որտեղ բուժում են ստանում կորոնավիրուսով վարակված ՀՀ քաղաքացիները: Եվս 50 մլն դրամ կփոխանցվի ՀՀ կառավարության կողմից կորոնավիրուսի դեմ պայքարի համար բացված հատուկ հաշվեհամարին։

«Գրանդ Հոլդինգ»-ի սեփականատերեր Կարեն և Միքայել Վարդանյանները ևս փոխանցել են 100 միլիոն ՀՀ դրամ՝ վարակի տարածումը կանխելու և բուժաշխատողներին աջակցելու նպատակով:

Երկրորդ խոշոր նվիրատվությունն արել է ԱԺ պատգամավոր, գործարար Գագիկ Ծառուկյանը՝ փոխանցելով 60 մլն դրամ: Դրանից 35 մլն դրամը տրամադրվել է «Նորք» ինֆեկցիոն հիվանդանոցին, 10 մլն դրամն ուղղվել է բժիշկների պարգևավճարներին, 15 մլն դրամ էլ Գյումրու հիվանդանոցին, որտեղ այս պահին 20 հիվանդ է բուժում ստանում։

Կորոնավիրուսի կանխարգելման և հաղթահարման համար բացված հինադրամին 50 միլիոն դրամ է փոխանցել «Աջարաբեթ» ընկերությունը՝ զբաղեցնելով խոշոր նվիրատվությունների 3-րդ հորիզոնականը:

4-րդ տեղը կիսելով՝ 20-ական միլիոն դրամներ են նվիրաբերել Մայր Աթոռը՝ Ամենայն Հայոց Գարեգին 2-րդ Հայրապետի կարգադրությամբ, և ԱԺ ՀՀԿ-ական նախկին պատգամավոր, գործարար Սամվել Ալեքսանյանին պատկանող «Երևան սիթի» սուպերմարկետների ցանցը։

Նշենք, որ ՀՀ ֆինանսների նախարարությունը տեղեկացնում է, որ 17.03.2020թ. գանձապետարանում բացված «Ֆիզիկական անձանց և կազմակերպությունների նվիրաբերությունից պետությանը, կորոնավիրուսային վարակի (COVID-19) կանխարգելման և հաղթահարման ապահովման համար ֆինանսական աջակցություն» 900005001947 հաշվին 26.03.20թ. ժամը 18:00-ի դրությամբ մուտքերը կազմել են 660.766.504.3 դրամ, իսկ մուտքերի ընդհանուր քանակը 2698: Նկատենք, որ ստացված միջոցներն օգտագործվելու են բժշկական անձնակազմի խրախուսման, բժշկական պարագաների և սարքավորումների ձեռք բերման, ինչպես նաև բժշկական կենտրոնների շենքային պայմանների բարելավման համար։