Քեզ շա՜տ եմ սիրում, Արի. Լևոն Արոնյանի կինը կրկին տեղափոխվել է վերակենդանացման բաժանմունք

Հայաստանի առաջատար գրոսմայստեր, ՖԻԴԵ-ի աշխարհի գավաթակիր Լևոն Արոնյանի կնոջ` Արիանա Կաոիլիի առողջական վիճակը վատացել է, թոքերի հետ կապված խնդիրների պատճառով նա կրկին տեղափոխվել է վերակենդանացման բաժանմունք: Այս մասին գրել է Sputnik Արմենիան:

ԼՈՒՐԵՐ.com-ը փորձեց առավել մանրամասն տեղեկություն ստանալ «Աստղիկ» բժշկական կենտրոնից, որտեղ գտնվում է Արիանան: Սակայն մեզ հետ զրույցում «Աստղիկ» ԲԿ-ի տնօրեն Ռոբերտ Կուրղինյանը նշեց՝ Արիանայի առողջական վիճակի մասին որևէ տեղեկություն հայտնել չի կարող, քանի որ վերջինիս ամուսնու հետ պայմանավորվել են, որ տեղեկություններ կարող է հաղորդել միայն նրանց գրասենյակը: 

Արիանա Կաոիլիի մասին իր ֆեյսբուքյան էջում գրել է նաև նրա ընկերուհին՝ Անի Դավիթը. «Ես տեսնում եմ որոշ սխալ տեղեկություններ Arianne Caoili- ի մասին: Խնդրում եմ՝ մի՛ կիսվեք նրա առողջական վիճակի մասին տարածվող կեղծ տեղեկություններով: Նա դեռ գտնվում է հիվանդանոցում և հույս ունեն, որ շուտով կապաքինվի: Խնդրում եմ աղոթել նրա և նրա արագ վերականգնման համար: Անհամբեր սպասում եմ, որ հաջորդ գրառումս լինելու է այն մասին, թե ինչպես է նա լքում հիվանդանոցը... Քեզ շա՜տ եմ սիրում, Արի»,- գրել է Արիանայի ընկերուհին:

Նկատենք, որ Արիանայի ֆեյսբուքյան էջում տեղադրված լուսանկարների մեկնաբանություններում օգտատերերը աղոթում ու առողջություն են մաղթում նրան: 

Ավելի վաղ հայտնի էր դարձել, որ Արիանան վերակենդանացման բաժանմունքից տեղափոխվել էր վիրաբուժական բաժանմունք: