2 անչափահաս և հիվանդ սկեսուր․ Գեղարքունիքի առաջին վարակակիրը 34-ամյա կին է

Մամուլում տարածվեցին տեղեկություններ, թե Գեղարքունիքի մարզի առաջին վարակակիրը Աստղաձոր համայնքից է: ԼՈՒՐԵՐ.com-ի թղթակիցը  նոր մանրամասներ պարզելու համար զրուցել է Աստղաձոր համայնքի ղեկավար Ռոբերտ Խաչատրյանի հետ: «Մեր համայնքից 34-ամյա կին կա, ով 10 օր պառկած էր Մարտունիի հիվանդանոցում, հետո տեղափոխեցին Նորքի ինֆեկցիոն հիվանդանոց, բայց ես դեռ չգիտեմ՝ հաստատված դեպքն ինքն է, թե այլ մարդու հետ է կապված»:Համայնքի ղեկավարի խոսքով՝ իրեն ազգային անվտանգության ծառայությունից հրահանգել են կնոջ ընտանիքի անդամներին զգուշացնել, որ պետք է մեկուսանան, մինչև իրենք միջոցներ կձեռնարկեն: «Ամուսինն արտերկրում է, տանը երկու անչափահաս կա, սկեսուրն էլ՝ անկողնային պառկած, իրենք մեր տեղեկություններով շփումներ չեն ունեցել, հստակ ասել դեռ չեմ կարող: Ես զգուշացրել եմ, որ տնից դուրս չգան, մինչև տեսնենք՝ ինչ է լինում»: Համայնքապետը վստահեցրեց, որ համայնքում այլ դեպք չկա, գանգատներ ունեցող քաղաքացիների մասին էլ ոչինչ չի լսել: