Մարգարիտա Գրիգորյանն ու Պետրոս Ղազարյանը ազատման դիմումնե՞ր են գրել. Արա Շիրինյանը չհերքեց

Հանրային հեռուստաընկերության գործադիր տնօրեն Մարգարիտա Գրիգորյանի ու  Լրատվական և քաղաքական ծրագրերի տնօրեն Պետրոս Ղազարյանի ազատման դիմումների հետ կապված տեղեկությունը ԼՈՒՐԵՐ.com-ի հետ զրույցում Հանրային ՀՌԸ խորհրդի նախագահ Արա Շիրինյանը ոչ հաստատեց, ոչ էլ հերքեց: «Այս պահին չեմ կարող հաստատել»,- ասաց նա: Մեր դիտարկմանը՝ այսինքն չի էլ հերքո՞ւմ տեղեկությունը, Շիրինյանը դրական պատասխան տվեց: Նա նշեց, որ վարչապետի ուղերձի վերաբերյալ առաջիկայում քննարկում կլինի. «Խորհրդի նիստ կհրավիրվի, որի ժամանակ կքննարկենք, արդյունքների մասին կհայտնենք»,- նշեց նա: Նշենք, որ ըստ տեղեկությունների՝ բացի Մարգարիտա Գրիգորյանից ու Պետրոս Ղազարյանից, այլ աշխատակիցներ էլ են ազատվել աշխատանքից: Հիշեցնենք, որ ՀՀ վարչապետ Նիկոլ Փաշինյանի՝ ապրիլի 17-ի հեռուստաուղերձի նախապատրաստական աշխատանքների կադրերը հայտնվել են համացանցում: Կադրերում երևում է, թե ինչպես է վարչապետը հազում, դեղ և ջուր խմում: Սակայն քննարկման առարկան ոչ թե այս հանգամանքն է, այլ թե ինչպես է կադրերի արտահոսք եղել, ինչը դեռևս պարզված չէ: Նշենք, որ վարչապետի ելույթի ուղիղ եթերն ապահովել էր Առաջին ալիքը, որն ազատ կապուղուց օգտվելու հնարավորություն էր տվել 8 այլ ՀԸ-ների:

Սոնա Հարությունյան