Եթե նորից ընտրություն լինի, Փաշինյանին ոչ ոք չի ընտրի. արտադրամասի աշխատակից

Մենք մի քանի անգամ անդրադարձել ենք Վանաձորի «Գլորիա» կարի արտադրամասի աշխատակիցների խնդիրներին: Այնտեղ աշխատում է շուրջ 2600 մարդ, ովքեր արտակարգ դրության պայմաններում անգործ են և կառավարության կողմից մշակված որևէ ծրագրից օգտվել չեն կարող: Օրեր առաջ նրանց խնդրին անդրադարձավ նաև Լոռու մարզպետ Անդրեյ Ղուկասյանը: Վերջինս իր ֆեյսբուքյան էջում գրել էր, որ կապ է հաստատել պարետատան հետ, որտեղից տեղեկացրել են, որ ընկերության վերագործարկման համար «Գլորիա» կարի ֆաբրիկայի տնօրենի կողմից ուղարկված դիմումը պարետատունը ստացել է: Մարզպետը նաև հույս էր հայտնել, որ պարետի որոշումը դրական կլինի: Թեմայի շուրջ ԼՈՒՐԵՐ.com-ի թղթակիցը զրուցեց արտադրամասի մի քանի աշխատակիցների հետ: «Իհարկե, գովելի է մարզպետի անդրադարձը և միաջամտությունը, բայց անձամբ ես հույս չունեմ, որ մենք կսկսենք աշխատել: Ամսից ավելի է չենք աշխատում, ցավոք սոցիալական աջակցության որևէ ծրագրից նույնպես չենք կարող օգտվել, քանի որ չափորոշիչներին չենք համապատասխանում: Չգիտենք էլ, թե այսպես որքան կարող է շարունակվել, երբ պետք է կումունալ վճարումներ իրականացնել, սնունդ ու դեղորայք գնել: Ցավոք, մեր ամբողջ անձնակազմը հիասթափված է Փաշինյանից: Հիմա, եթե նորից ընտրություններ լինեն, Փաշինյանին ոչ ոք չի ընտրի: Մինչդեռ մենք՝ բոլորս, նրա կողմից ենք եղել ու վստահել նրան»,-ասաց մեր զրուցակիցը: Արտադրամասի մեկ այլ աշխատակցուհի ավելի իրատեսական է համարում, որ մոտ օրերս պարետի որոշմամբ կսկսեն աշխատել. «Միակ խնդիրը կարող է լինել, այն, որ մեզ մեծ ընդհանուր ավտոբուսներով են տանում աշխատանքի, իսկ դա հիմա վտանգավոր է: Եթե այդ հարցը կարողանան լուծել, ապա շատ հնարավոր է, որ աշխատենք: Առանց աշխատանքի շատ դժվար է: Մենք իսկապես  այդ աշխատանքի կարիքն ունենք, որքան տանը նստենք, մեզ ով կպահի»: