ՊՊԾ-ի աշխատակիցներին ստիպում են վերադարձնել աջակցության ծրագրով ստացած գումարները

Օրեր շարունակ ՊՊԾ գնդի աշխատակիցներն ահազանգում են, որ «վերևներից» իրենց նախազգուշացնում են վերադարձնել կորոնավիրուսի տնտեսական հետևանքների չեզոքացմանն ուղղված միջոցառումների շրջանակներում տրվող սոցիալական աջակցության գումարները, որոնք ստացել են:

Թեմայի վերաբերյալ ԼՈՒՐԵՐ.com-ի թղթակիցը զրուցեց աշխատակիցներից մեկի հետ. նա շարքային աշխատող է, ում անունը գաղտնի ենք պահում՝ իր իսկ խնդրանքով:

«Մի քանի օր առաջ ժողով արեցին, ասեցին՝ բոլոր նրանք, ովքեր լրացրել են աջակցության ծրագրերն ու ստացել են գումարներ, պետք է վերադարձնեն: Ասեցին՝ ձեզ չպիտի թույլ տայիք ու ծրագրերից օգտվեիք, բայց սխալվել եք, հիմա պետք է վերադարձնեք գումարները»,- պատմեց մեր զրուցակիցը:

Աշխատակցից տեղեկացանք, որ իրենք օգտվել են աջակցության 9-րդ ծրագրից, որի շահառու են համարվում 0-18 տարեկան երեխա ունեցող այն ընտանիքները, որոնցում երկու ծնողներն էլ չունեն գրանցված աշխատանք: Այնուամենայնիվ, ՊՊԾ-ում գրանցված աշխատակցի կինը հայտը լրացրել է և իր անչափահաս երեխայի համար ստացել է միանվագ տրվող 26.500 դրամը, իսկ ՊՊԾ-ում դա դարձել է անախորժության պատճառ:

«Այսօր արդեն երկրորդ անգամ ժողով արեցին, նորից ասացին, որ պիտի վերադարձնենք գումարները: Ասացին, որ մեզ հաշվեհամար կտան, դրան կփոխանցենք, բայց դեռ չեն տվել, ինձ թվում է՝ աշխատավարձից կպահեն կամ հավելավճարները չենք ստանա»,- ասում է ՊՊԾ աշխատակիցն ու հավելում, որ մենակ իրենք չէ, որ որպես գրանցված աշխատող ստացել են աջակցությունը, ԱԻՆ-ում ևս նման դեպքեր եղել են:

«Եթե մեզ չէր հասնում էդ գումարը, ինչի են տվել, հիմա էլ հետ են ուզում: Մարդ կա երեք-չորս երեխա ունի, հիմա որ աշխատավարձից էդքան գումար պահեն, ոնց կապրի»,- ասաց նա:

Մեր հարցին՝ արդյո՞ք եղել է սպառնալիք, թե ինչ կլինի չվերադարձնելու դեպքում, աշխատակիցը պատասխանեց. «Առաջին անգամ, որ ասացին պիտի հետ տաք, մենք կտրուկ մերժեցինք, բայց էսօր արդեն հիսուն-հիսուն էր, եթե իրոք բանը հասնի տալուն, պիտի տանք, թե չէ հաստատ լավ չի վերջանա: Բայց դե մեզ չեն սպառնացել, երկու անգամն էլ հանգիստ զգուշացրել են»,- եզրափակեց նա: